मोठी बातमी! वृद्धिमान साहावर कोरोनाचा ‘डबल अटॅक’, दुसऱ्यांदा आढळला पॉझिटिव्ह

कोविड-१९ महामारीमुळे इंडियन प्रीमियर लीग २०२१ चा हंगाम अनिश्चित काळासाठी स्थगित करण्यात आला आहे. तत्पुर्वी सनरायझर्स हैदराबाद संघाचा यष्टीरक्षक फलंदाज वृद्धिमान साहा कोरोना पॉझिटिव्ह आढळला होता. त्यामुळे मागील काही दिवसांपासून तो दिल्लीत क्वारंटाईनमध्ये आहे. नुकतीच त्याची कोरोनाची दुसरी चाचणी करण्यात आली होती. याचा चाचणीतही साहाचा अहवाल पॉझिटिव्ह आल्याने त्याला धक्का बसला आहे.

१० दिवसांचा क्वारंटाईन कालावधी पूर्ण केल्यानंतर साहाची दुसरी कोरोना चाचणी करण्यात आली होती. या चाचणीचा अहवाल आज (१४ मे) आला असून तो पुन्हा एकदा कोरोना पॉझिटिव्ह आढळला असल्याचे सांगितले जात आहे. त्यामुळे त्याला अजून काही दिवस क्वारंटाईनमध्ये राहावे लागणार आहे आणि तिसऱ्या चाचणीत आपला अहवाल निगेटिव्ह येण्याची वाट पाहावी लागणार आहे.

असे असले तरीही, सुदैवाने त्याच्यात कोरोनाची काही लक्षणे आढळलेली नाहीत. त्याची अंगदुखी, ताप आणि खोकला बरा आहे.

काही दिवसांपुर्वीच साहाने आपला कोरोनाविरुद्दचा लढा किती कठोर होता, याचा उलगडा केला होता. एका मासिकाला दिलेल्या मुलाखतीत साहाने कोरोना संसर्ग झाल्यानंतरचा त्याचा अनुभव सांगितला होता. तो म्हणाला होता की, ‘माझे सराव सत्र संपल्यानंतर मला थकवा जाणवत होता. मला थंडी जाणवत होती आणि मला सौम्य खोकला लागला होता. याबद्दल मी टीमच्या डॉक्टरांना माहिती दिली. त्याच दिवशी माझी कोरोना चाचणी झाली. दुसर्‍या दिवशी हा अहवाल निगेटिव्ह आला. दुसर्‍या दिवशीही चाचणी घेण्यात आली आणि त्याचाही अहवाल निगेटिव्ह आला. मला इतरांसोबत राहण्यास नकार देण्यात आला होता कारण तोपर्यंत मला तापही येऊ लागला होता. अखेर तिसर्‍या कोरोना चाचणीत मी पॉझिटिव्ह आढळलो.’