कोरिओग्राफर आणि सोशल मीडिया इन्फ्लुएंसर धनश्री वर्मा सध्या ‘राईज अँड फॉल’ या रिअलिटी शोमध्ये सहभागी झाली असून, तिथे ती तिच्या वैयक्तिक आणि व्यावसायिक आयुष्याबाबत खुलेपणाने बोलताना दिसतेय. विशेषतः पती आणि भारतीय क्रिकेटपटू युजवेंद्र चहल याच्याशी असलेल्या नात्यावर तिनं केलेले काही धक्कादायक वक्तव्य सध्या सोशल मीडियावर चर्चेचा विषय ठरत आहेत. शोमध्ये धनश्रीनं सांगितलं की, लग्नानंतर दुसऱ्याच महिन्यात तिला कळलं की हे नातं टिकणार नाही, कारण तिला त्या टप्प्यावरच धोका मिळाल्याचं जाणवलं. इतकंच नाही तर, तिनं अभिनेता अर्जुन बिजलानीसमोरही सांगितलं की, युजवेंद्र चुकीचा असतानाही तिनं त्याला अनेकदा पाठिंबा दिला, कारण तिला हे नातं टिकवायचं होतं.
या आरोपांवर आता युजवेंद्र चहलनं मौन सोडलं आहे. हिंदुस्थान टाइम्सला दिलेल्या मुलाखतीत त्यानं स्पष्ट केलं की, “मी एक खेळाडू आहे आणि मी कधीही चिटींग केलेली नाही. जर मी दोन महिन्यांतच चीट केलं असतं, तर आमचं नातं इतक्या वर्षं कसं टिकलं असतं? माझ्यासाठी ‘धनश्री’ नावाचा अध्याय आता संपलाय. मी माझ्या आयुष्यात पुढे गेलोय आणि इतरांनीही तसंच करावं.” चहलनं हेही म्हटलं की, काही लोक अजूनही भूतकाळात अडकलेले आहेत आणि त्यांच्या आयुष्याचं केंद्र त्याच्याशी संबंधित गोष्टींवरच अवलंबून आहे, त्यामुळे ते हे सगळं सुरू ठेवतील, पण यानं आता आपल्याला काही फरक पडत नाही.
त्यानं हेही ठामपणे सांगितलं की, “सोशल मीडियावर अनेक चर्चा सुरु असतात, पण सत्य एकच असतं आणि जे लोक माझ्यासाठी महत्त्वाचे आहेत, त्यांना ते माहित आहे. हा अध्याय माझ्यासाठी संपलाय. मी आता फक्त माझ्या आयुष्यावर आणि खेळावर लक्ष केंद्रित करतोय. सध्या मी सिंगल आहे आणि पुन्हा लग्न करण्याचा कोणताही हेतू नाही.”
2020 मध्ये युजवेंद्र चहल आणि धनश्री वर्मा यांचं मोठ्या थाटामाटात लग्न झालं होतं. त्याआधी त्यांनी 6-7 महिने एकमेकांना डेट केलं होतं. चहलनं डान्स शिकण्यासाठी धनश्रीशी संपर्क केला आणि मैत्रीतून त्यांचं नातं प्रेमात बदललं. मात्र सध्या दोघांचं नातं संपुष्टात आलं असून, त्यांनी आपापल्या वाटा वेगळ्या केल्या आहेत. एकेकाळी गाजलेली ही प्रेमकहाणी आता फक्त भूतकाळाचा एक भाग बनून राहिली आहे.
