आयपीएल 2026 लिलाव सुरू झाला आहे तत्पूर्वी एका 17 वर्षांच्या फलंदाजाने आपल्या धडाकेबाज कामगिरीने सर्वांची मने जिंकली आहेत. अंडर-19 आशिया कप 2025 मध्ये भारत आणि मलेशिया यांच्यात सामना सुरू आहे. या सामन्यात अभिज्ञान कुंडूने (Abhidyaan kundu) उत्तुंग षटकार मारत हे सिद्ध केले की, तो मोठ्या स्तरावर खेळण्यासाठी पूर्णपणे तयार आहे. आयपीएल लिलावापूर्वी त्याची ही खेळी त्याला खूप फायदेशीर ठरू शकते आणि अनेक संघ त्याच्यावर कोट्यवधींची बोली लावू शकतात.
अभिज्ञान कुंडूने मलेशियाविरुद्ध कठीण परिस्थितीत फलंदाजी केली. खेळपट्टीवर स्थिरावल्यानंतर त्याने फटकेबाजी सुरू केली. त्याने वेदांत त्रिवेदीसोबत मोठी भागीदारी रचली. सुरुवातीला त्याने 80 चेंडूंत 127 च्या स्ट्राईक रेटने शानदार शतक ठोकले, ज्यात 11 चौकार आणि 1 षटकाराचा समावेश होता. त्यानंतर तो थांबला नाही आणि त्याने अधिक वेगाने धावा काढल्या. त्याने अवघ्या 121 चेंडूंत आपले द्विशतक पूर्ण केले. 50 षटके संपली तेव्हा तो 125 चेंडूंत 225 धावा करून नाबाद राहिला. त्याच्या या संपूर्ण खेळीत 17 चौकार आणि 9 षटकारांचा समावेश होता. त्याचे फटके पाहून चाहत्यांना ख्रिस गेलची आठवण येत होती.
अभिज्ञान कुंडू हा डाव्या हाताचा फलंदाज असून तो विकेटकीपिंगचा पर्यायही आहे. कुंडू लोअर-मिडल ऑर्डरमध्ये (खालच्या फळीत) फलंदाजी करतो, ज्यामुळे तो अधिक खास खेळाडू ठरतो. अनेक आयपीएल संघांना अशा फलंदाजाची गरज आहे जो डाव सावरू शकेल आणि गरज पडल्यास मोठे फटके मारू शकेल. अशा परिस्थितीत, CSK, KKR आणि SRH सारखे संघ त्याच्यासाठी मोठी बोली लावू शकतात. या संघांना खालच्या फळीत चांगल्या बॅकअप फलंदाजाची गरज आहे आणि कुंडू त्यांच्यासाठी एक उत्तम पर्याय ठरू शकतो.
