इंडियन प्रीमियर लीगमध्ये (आयपीएल) ज्या संघाकडे सर्वात महागडा खेळाडू आहे, तोच संघ आजवर एकदाही आयपीएल ट्रॉफी जिंकू शकलेला नाही. हा संघ म्हणजे विराट कोहली कर्णधार असलेला रॉयल चॅलेंजर्स बेंगलोर (आरसीबी). त्यांनी आतापर्यंत २००९, २०११ आणि २०१६ या तीन हंगामात आयपीएलच्या अंतिम सामन्यापर्यंत मजल मारली आहे. पण, दुर्दैवाने तिन्हीवेळा त्यांच्या वाट्याला अपयश आले आहे.
परंतु, आयपीएल २०२०मध्ये आरसीबी संघ खूप मजबूत असल्याचे दिसून येत आहे. त्यांच्याकडे क्रिकेटच्या सर्व विभागातील उत्तम खेळाडू उपलब्ध आहेत. त्यामुळे यंदा आयपीएल ट्रॉफी आरसीबी संघाच्या खात्यात जाण्याची शक्यता आहे.
या लेखात, त्या ३ कारणांवर आपण चर्चा करणार आहोत, ज्यामुळे आरसीबी आयपीएलच्या तेराव्या हंगामात ट्रॉफी जिंकू शकते. 3 Reasons Why RCB Can Win IPL 2020
३. संघात उत्कृष्ट भारतीय खेळाडूंचा समावेश
आयपीएलमध्ये शानदार प्रदर्शन करण्यासाठी संघात चांगल्या भारतीय खेळाडूंची आवश्यकता असते. कारण, संघातील ११ खेळाडूंमध्ये ७ भारतीय खेळाडूंचा समावेश असतो. यंदा विराटच्या नेतृत्त्वाखालील आरसीबीमध्ये काही दमदार युवा खेळाडू उपलब्ध आहेत. जर कोणत्या हंगामात आरसीबीने खराब प्रदर्शन केले. तर, ते संघातील बऱ्याच खेळाडूंना बाहेर करतात. पण गतवर्षी आरसीबीच्या खराब प्रदर्शनानंतरही संघाने शिवम दुबे, वॉशिंग्टन सुंदर आणि नवदीप सैनी या भारतीय खेळाडूंवर विश्वास दाखवला आहे. हे तिन्ही खेळाडू भारतीय संघातील सक्रिय खेळाडू आहेत.
आरसीबीने शिमरॉन हेटमायर आणि कॉलिन डी ग्रॅंडहोम या परदेशी खेळाडूंना संघाबाहेर करुन या युवा भारतीय खेळाडूंना पुन्हा संधी दिली आहे. दुबे, सुंदर आणि नवदीप यांचे देशांतर्गत क्रिकेटमधील प्रदर्शनही उल्लेखनीय आहे. त्यामुळे हे तीन युवा भारतीय खेळाडू आरसीबीला आयपीएलचे विजेतेपद जिंकून देऊ शकतात.
