भारतीय क्रिकेट संघ आता (indian Cricket team) 2027 च्या आयसीसी वनडे विश्वचषकाच्या तयारीसाठी पूर्णपणे सज्ज झाला आहे. टीम इंडिया सध्या एकामागोमाग एक वनडे मालिका खेळत आहे. अफगाणिस्तानविरुद्धच्या वनडे (Ind vs AFG) मालिकेसाठी काही खेळाडूंना विश्रांती देण्यात आली आहे, जे इंग्लंडविरुद्धच्या वनडे मालिकेत पुनरागमन करू शकतात. हे सर्व खेळाडू 2027 च्या विश्वचषकासाठी प्रबळ दावेदार मानले जात असून, त्यांनी दीर्घकाळापासून भारतीय संघासाठी चांगली कामगिरी केली आहे.
जसप्रीत बुमराह
बीसीसीआयने वेगवान गोलंदाज जसप्रीत बुमराहला (Jasprit Bumrah) अफगाणिस्तानविरुद्धच्या मालिकेसाठी विश्रांती दिली आहे. तसेच, तो आयर्लंड आणि इंग्लंडविरुद्धच्या टी-20 मालिकेचाही भाग नाही. आता तो आशियाई क्रीडा स्पर्धेपूर्वी इंग्लंडविरुद्धच्या वनडे मालिकेत खेळताना दिसू शकतो. 2027 च्या विश्वचषकापूर्वी त्याला जास्तीत जास्त वनडे सामने खेळायचे आहेत. बुमराहच्या पुनरागमनानंतर प्रिंस यादवला संघातून बाहेर बसावे लागू शकते.
रवींद्र जडेजा
स्पिन अष्टपैलू खेळाडू रवींद्र जडेजा (Ravindra Jadeja) अफगाणिस्तानविरुद्धच्या कसोटी आणि वनडे मालिकेत खेळलेला नाही. मात्र, तो इंग्लंडविरुद्धच्या वनडे मालिकेत पुनरागमन करू शकतो. किरकोळ दुखापतीमुळे त्याने आयपीएलचे काही सामनेही गमावले होते. जडेजाच्या पुनरागमनानंतर हर्ष दुबेला (Harsh Dubey) संघातून वगळले जाऊ शकते.
मोहम्मद सिराज
वेगवान गोलंदाज मोहम्मद सिराजही (Mohmmed Siraj) सध्या अफगाणिस्तानविरुद्धच्या वनडे मालिकेचा भाग नाही. त्यालाही लवकरच संघात पुन्हा संधी मिळण्याची शक्यता आहे. बीसीसीआयने आगामी महत्त्वाच्या मालिकांपूर्वी त्याला विश्रांती मिळावी म्हणून आयर्लंड आणि इंग्लंडविरुद्धच्या टी-20 मालिकेतून त्याचे नाव मागे घेतले आहे.
विराट कोहली
सुपरस्टार फलंदाज विराट कोहली (Virat Kohli) दुखापतीमुळे अफगाणिस्तानविरुद्धच्या वनडे मालिकेतून बाहेर आहे. मात्र, रिपोर्ट्सनुसार, ‘किंग कोहली’ इंग्लंडविरुद्धच्या वनडे मालिकेपर्यंत पूर्णपणे तंदुरुस्त होऊ शकतो. अशा स्थितीत त्याचे संघात परतणे जवळपास निश्चित आहे. विशेष म्हणजे, विराट कोहली आता केवळ वनडे फॉरमॅटवरच लक्ष केंद्रित करताना दिसू शकतो.
