अर्शदीप सिंग हा टी20 आंतरराष्ट्रीय क्रिकेटमध्ये भारतीय संघाचा एक महत्त्वाचा दुवा आहे. त्याने अनेक सामन्यांमध्ये एकट्याने भारतीय संघाला विजय मिळवून दिला आहे. इंग्लंड दौऱ्यावर तो कसोटी संघाचा भाग होता, परंतु एकाही सामन्याच्या अंतिम इलेव्हनमध्ये त्याचा समावेश नव्हता. तो आशिया कप 2025 मध्ये खेळताना दिसण्याची अपेक्षा आहे. यामध्ये खेळून अर्शदीप टी20 आंतरराष्ट्रीय क्रिकेटमध्ये मोठी कामगिरी करू शकतो. तो टी20 आंतरराष्ट्रीय क्रिकेटमध्ये 100 बळी पूर्ण करण्यापासून फक्त एक विकेट दूर आहे.
अर्शदीप सिंग एक विकेट घेताच टी20 आंतरराष्ट्रीय क्रिकेटमध्ये 100 बळी पूर्ण करेल आणि असे करणारा तो पहिला भारतीय बनेल. आतापर्यंत कोणत्याही भारतीयाला टी20 आंतरराष्ट्रीय क्रिकेटमध्ये 100 बळी घेता आलेले नाहीत. त्याने 2022 मध्ये भारतीय संघासाठी टी-20 आंतरराष्ट्रीय क्रिकेटमध्ये पदार्पण केले. तेव्हापासून तो महत्त्वाच्या प्रसंगी संघासाठी हिरो असल्याचे सिद्ध झाले आहे. आतापर्यंत त्याने भारतीय संघासाठी 63 टी20 सामन्यांमध्ये एकूण 99 विकेट्स घेतल्या आहेत.
अर्शदीप सिंगने त्याच्या टी20 कारकिर्दीची सुरुवात मेडन ओव्हर टाकून केली. तो डेथ ओव्हरमध्ये घातक गोलंदाजी करतो आणि यॉर्कर टाकण्याची अद्भुत कला त्याच्याकडे आहे. 2024 च्या टी20 विश्वचषकात त्याने उत्कृष्ट गोलंदाजी केली आणि 17 विकेट्स घेतल्या. संघाला विश्वचषक जिंकून देण्यात त्याने महत्त्वाची भूमिका बजावली.
भारतासाठी टी20 क्रिकेटमध्ये सर्वाधिक विकेट्स घेण्याच्या बाबतीत युझवेंद्र चहल दुसऱ्या क्रमांकावर आहे. त्याने आतापर्यंत 96 विकेट्स घेतल्या आहेत. स्टार अष्टपैलू हार्दिक पांड्या 94 विकेट्ससह तिसऱ्या क्रमांकावर आहे. एकूण टी20 आंतरराष्ट्रीय क्रिकेटमध्ये सर्वाधिक विकेट्स घेण्याचा विक्रम टिम साउथीच्या नावावर आहे. साऊदीने टी20 क्रिकेटमध्ये एकूण 164 विकेट्स घेतल्या आहेत.
