तिसऱ्या सामन्यादरम्यान संघाला मोठा धक्का; स्टार खेळाडू बाहेर!

अ‍ॅडलेडमध्ये होणाऱ्या तिसऱ्या Ashes कसोटीपूर्वी ऑस्ट्रेलियन संघाला मोठा झटका बसला आहे. स्टार फलंदाज स्टीव्ह स्मिथ आजारपणामुळे सामन्यातून बाहेर पडला आहे. गेल्या काही दिवसांपासून स्मिथ अस्वस्थ होता आणि सामन्याच्या सकाळीच त्याला प्लेइंग इलेव्हनमधून वगळण्यात आले.

त्याच्या जागी अनुभवी उस्मान ख्वाजाला तातडीने संघात संधी देण्यात आली आहे. कर्णधार पॅट कमिन्सने नाणेफेक जिंकून प्रथम फलंदाजी निवडल्यानंतर स्मिथच्या अनुपस्थितीची अधिकृत पुष्टी केली. कमिन्स म्हणाला, “स्टीव्हची तब्येत ठीक नाही, त्यामुळे तो घरी परतला आहे. मात्र त्याच्या जागी उस्मान ख्वाजासारखा अनुभवी खेळाडू आमच्याकडे आहे.” ख्वाजा स्मिथच्या आवडत्या नंबर-4 स्थानावर फलंदाजी करणार असल्याचेही त्यांनी स्पष्ट केले. त्यामुळे ट्रॅव्हिस हेड आणि जेक वेदराल्ड पुन्हा एकदा सलामीला उतरतील.

क्रिकेट ऑस्ट्रेलियाने स्मिथच्या प्रकृतीबाबत निवेदन जारी करताना सांगितले की, त्याला मळमळ आणि चक्कर येणे अशी लक्षणे होती. तो खेळणार होता, मात्र लक्षणे कायम राहिल्याने खबरदारी म्हणून न खेळवण्याचा निर्णय घेण्यात आला. मेलबर्नमधील बॉक्सिंग डे टेस्टसाठी स्मिथ उपलब्ध होईल, अशी अपेक्षा व्यक्त करण्यात आली आहे.

या सामन्यासाठी ऑस्ट्रेलियाच्या प्लेइंग इलेव्हनमध्ये एकूण तीन बदल झाले आहेत. नाथन लायनचे पुनरागमन झाले असून पॅट कमिन्स आणि उस्मान ख्वाजा संघात परतले आहेत. तर मायकेल नेसर, ब्रेंडन डोगेट आणि स्टीव्ह स्मिथ यांना बाहेर बसावे लागले आहे. दुसरी कसोटी आठ विकेट्सने जिंकून ऑस्ट्रेलियाने मालिकेत आपली पकड मजबूत केली होती.

इंग्लंडचा कर्णधार बेन स्टोक्स म्हणाला की, तोही अ‍ॅडलेडमध्ये आधी फलंदाजीच निवडला असता. इंग्लंडने संघात एक बदल केला असून जॉश टंगला संधी देण्यात आली आहे, तर गस अ‍ॅटकिन्सन बाहेर आहे.

दोन्ही संघाच्या प्लेइंग XI

ऑस्ट्रेलिया:
जेक वेदराल्ड, ट्रॅव्हिस हेड, मार्नस लाबुशेन, उस्मान ख्वाजा, कॅमेरून ग्रीन, अ‍ॅलेक्स कॅरी, जोश इंग्लिस, पॅट कमिन्स (कर्णधार), मिचेल स्टार्क, नाथन लायन, स्कॉट बोलँड.

इंग्लंड:
जॅक क्रॉली, बेन डकेट, ओली पोप, जो रूट, हॅरी ब्रूक, बेन स्टोक्स (कर्णधार), जेमी स्मिथ (यष्टीरक्षक), विल जॅक्स, ब्रायडन कार्स, जोफ्रा आर्चर, जोश टंग