आशिया चषक 2023 स्पर्धेचा अंतिम सामना रविवारी (17 सप्टेंबर) कोलंबो येथे खेळला गेला. या महामुकाबल्यात भारताने श्रीलंकेचा 10 विकेट्सने धुव्वा उडवला. या विजयासह भारताने तब्बल आठव्यांदा ही स्पर्धा आपल्या नावे करण्याचा बहुमान आपल्या मिळवला. मात्र, यापूर्वी कोणकोणत्या संघांनी ही मानाची स्पर्धा आपल्या नावे केली आहे, हे या लेखात आपण पाहूयात…
भारतीय संघाने (Team India) 1983मध्ये विश्वचषक जिंकल्यानंतर पुढच्या वर्षी शारजा येथे पहिला आशिया चषक (Asia Cup) खेळला गेला. अंतिम सामन्यात भारतीय संघाने श्रीलंकेला पराभूत करत स्पर्धा आपल्या नावे केली. त्यानंतर 1986 मध्ये श्रीलंकेने यजमानपद भूषवलेल्या स्पर्धेच्या अंतिम सामन्यात श्रीलंकेने पाकिस्तानला पराभूत करत विजेतेपद जिंकले. भारतीय संघाने या स्पर्धेतून माघार घेतली होती. 1988 मध्ये पुन्हा भारत-श्रीलंका असा अंतिम सामना झाला. श्रीलंका अंतिम सामन्यात पराभूत झाली. तर, भारतीय संघाने दुसऱ्यांदा ही स्पर्धा जिंकली.
सन 1990-1991 मध्ये भारतात आशिया चषकाचे आयोजन केले गेले. या स्पर्धेतून पाकिस्तानने राजकीय कारणाने माघार घेतली होती. त्यावेळी पुन्हा भारताने श्रीलंकेला पराभूत करत तिसऱ्यांदा स्पर्धा आपल्या नावे केली. 1993 मध्ये स्पर्धेचे आयोजन केले गेले नाही. त्यानंतर 1995 मध्ये भारत, पाकिस्तान व श्रीलंका समान गुणांवर राहिले असताना, सरस धावगतीच्या जोरावर भारत व श्रीलंकेने अंतिम फेरीत प्रवेश केला. ज्यामध्ये भारताने श्रीलंकेवर मात करत चषक उंचावला. तर 1997 मध्ये श्रीलंकेने यजमानपद भूषवत असताना स्पर्धा देखील आपल्या नावे केली.
आशिया चषकाचे पुढील आयोजन 2000 मध्ये बांगलादेशमध्ये झालेले. येथे पाकिस्तानने श्रीलंकेला पराभूत करत पहिल्यांदाच आशिया चषक जिंकला. त्यानंतर आशिया चषकाचे आयोजन थेट चार वर्षांनी 2004 मध्ये झाले. प्रथमच सहा संघांच्या झालेल्या या स्पर्धेत श्रीलंकेने भारताला पराभूत करत तिसऱ्यांदा स्पर्धा जिंकली. तर, श्रीलंकेने त्यानंतर 2008 मध्ये देखील भारताला पराभूत करून आपले विजेतेपद राखले.
भारतीय संघाने त्यानंतर 2010 स्पर्धेचे विजेतेपद जिंकत, 15 वर्षाचा दुष्काळ संपवला. तर, 2012 मध्ये पाकिस्तानी दुसऱ्यांदा स्पर्धा आपल्या नावे केली. श्रीलंकेने 2014 मध्ये आपले पाचवे आशिया चषक विजेतेपद जिंकले.
टी20 विश्वचषकाच्या पार्श्वभूमीवर 2016 मध्ये प्रथमच आशिया चषक टी20 स्वरूपात खेळला गेला. यामध्ये भारतीय संघाने विजेतेपद जिंकले. 2018 मध्ये पुन्हा एकदा वनडे स्वरूपात झालेल्या आशिया चषकात भारतीय संघाने अंतिम सामन्यात बांगलादेशवर वर्चस्व गाजवत सातव्यांदा स्पर्धा जिंकली. मागील वर्षी पुन्हा एकदा टी20 स्वरूपात झालेले आशिया चषक स्पर्धा श्रीलंकेने अनपेक्षितरीत्या आपल्या नावे केली. यानंतर आता आशिया चषक 2023 (Asia Cup 2023) स्पर्धेत भारतीय संघाने श्रीलंकेवर 10 विकेट्सने विजय मिळवत 8व्यांदा विजेतेपद नावावर केले.
8⃣th Asia Cup title in the bag 🇮🇳 pic.twitter.com/c6OOCZatnI
— ICC (@ICC) September 17, 2023
आतापर्यंतचे आशिया चषक विजेते: (Asia Cup Winner list From 1984 To 2023)
भारत (8 वेळा)*
श्रीलंका (6 वेळा)
पाकिस्तान (2 वेळा)
महत्वाच्या बातम्या-
टीम इंडिया आशियाई क्रिकेटची सरताज! श्रीलंकेला नमवत 8 व्यांदा जिंकला आशिया कप
पंगा घेणाऱ्या श्रीलंकेला भारताने दाखवला इंगा! अखेर 24 वर्षांनंतर घेतला बदला, 1999मध्ये लंकेने काय केलेलं?
