युवकांना संधी, कसोटीवर लक्ष, भावूक संदेश देत बेन स्टोक्सची एकदिवसीय क्रिकेटमधून निवृत्तीची घोषणा

इंग्लंडला २०१९ एकदिवसीय विश्वचषक जिंकवण्यासाठी सर्वात महत्वाची भूमिका पार पाडलेल्या बेन स्टोक्सने सोमवारी (१८ जुलै) एकदिवसीय क्रिकेटमधून निवृत्तीची घोषणा केली. मंगळवारी (१९ जुलै) दक्षिण आफ्रिकेविरुद्धचा पहिला एकदिवसीय सामना खेळल्यानंतर स्टोक्स या प्रकारातून निवृत्ती होईल. स्वतःच्या अधिकृत सोशल मीडिया खात्यावरून त्याने ही माहिती दिली आणि सोबतच निवृत्तीचे संविस्तर कारणही दिले आहे. 

आंतरराष्ट्रीय क्रिकेटमध्ये हवी असलेली शारीरिक आणि मानसिक गरज पाहता बेन स्टोक्स (Ben Stokes) एकदिवसीय क्रिकेटमधून निवृत्त होत असल्याचे दिसते. त्याला नुकतेच काही दिवसांपूर्वी इंग्लंडच्या कसोटी संघाचा कर्णधार बनवले गेले आहे. अशात आता क्रिकेटच्या तिन्ही प्रकारांमध्ये खेळत राहणे त्याच्यासाठी शक्य नसल्याचेही स्टोक्सने स्पष्ट केले.

इंस्टाग्राम पोस्टमध्ये स्टोक्सने लिहिले आहे की, “मी मंगळवारी डरहममध्ये इंग्लंड संघासाठी एखदिवसीय क्रिकेटमधील शेवटचा सामना खेळले. या प्रकारातून मी निवृत्तीचा निर्णय घेतला आहे. हा निर्णय खूप कठीण होता. संघातील सहकाऱ्यांसोबत खेळलेल्या प्रत्येक क्षणाचा मी पूर्ण आनंद घेतला आहे. आमचा प्रवास अप्रतिम राहिला.”

पोस्टमध्ये पुढे लिहिले आहे की, “हा निर्णय घेणे जेवढे कठीण होते, त्याच्या तुलनेत हे स्वीकार करणे कठीण नव्हते की, या प्रकारात मी संघ आणि सहकाऱ्यांना १०० टक्के देऊ शकणार नाही. इंग्लंड संघाचा शर्ट घालणाऱ्या प्रत्येकाकडून यापेक्षा काहीच कमी अपेक्षित नाहीये.”