बीसीसीआय (BCCI) आणि श्रीलंका क्रिकेट बोर्डासोबत मिळून आयसीसी (ICC) सध्या टी20 वर्ल्ड कप 2026 च्या तयारीला लागली आहे. स्पर्धा सुरू व्हायला आता अवघे 20 दिवस शिल्लक आहेत. अशा वेळी भारत सरकार पाकिस्तानी वंशाच्या खेळाडूंना भारताचा व्हिसा देत नसल्याच्या बातम्या येत होत्या. मात्र, आता या संदर्भात एक मोठी आनंदाची बातमी समोर आली आहे. पाकिस्तानी वंशाच्या खेळाडूंना आता आयसीसीकडून मोठी मदत मिळत आहे.
यूएसए (USA) टीमचा खेळाडू अली खान हा पाकिस्तानी वंशाचा आहे. त्याने सोशल मीडियावर भारताचा व्हिसा न मिळाल्याबद्दल संकेत दिले होते. त्यानंतरच 8 संघ सध्या बीसीसीआयवर नाराज असल्याच्या चर्चा सुरू झाल्या. खरं तर, सुमारे 8 संघांमध्ये पाकिस्तानी वंशाचे खेळाडू आहेत, त्यामुळे त्यांना व्हिसा मिळण्यात अडचणी येत होत्या. पीटीआय (PTI) च्या वृत्तानुसार, आता इंग्लंडच्या रेहान अहमद, आदिल रशीद आणि साकिब महमूद यांना टी-20 वर्ल्ड कप 2026 साठी भारताचा व्हिसा मिळाला आहे. आयसीसी एकूण 42 पाकिस्तानी वंशाच्या खेळाडूंना आणि सपोर्ट स्टाफला व्हिसा मिळवून देण्याचा प्रयत्न करत आहे. रिपोर्टनुसार, इतरांनाही लवकरच व्हिसा मिळेल.
या सर्व प्रकारात यूएसए आणि युएई (UAE) चे संघ सर्वात जास्त चिंतेत दिसत होते. यूएसएच्या संघात 4 ते 5 पाकिस्तानी वंशाचे खेळाडू दिसणार आहेत, तर युएईच्या संघात एकूण 7 असे खेळाडू खेळू शकतात. त्यामुळे हे संघ व्हिसाबाबत त्रस्त होते. या बातमीमुळे इतर संघांनाही मोठा दिलासा मिळणार आहे. भारत आणि पाकिस्तानमधील बिघडलेल्या संबंधांमुळेच सरकार पाकिस्तानी वंशाच्या खेळाडूंना व्हिसा देण्यास वेळ लावते, असे यापूर्वीही काही मालिकांमध्ये पाहायला मिळाले आहे.
