इंडियन प्रीमियर लीगच्या चौदाव्या हंगामातील चौथा सामना राजस्थान रॉयल्स आणि पंजाब किंग्स यांच्या दरम्यान खेळला गेला. हा सामना पंजाबने ४ धावांनी जिंकला. या सामन्यात पंजाबच्या फलंदाजांनी आक्रमक फलंदाजी करत २२१ धावा ठोकल्या. प्रत्युत्तरात, राजस्थान रॉयल्सचा संघ २० षटकांत २१७ धावा करु शकला. मोठ्या धावसंख्येच्या या सामन्यात पंजाबकडून खेळणाऱ्या ख्रिस गेलने मोठा विक्रम केला आहे.
या सामन्यात गेलने ४ चौकार आणि २ षटकारांसह २९ चेंडूत ४० धावांची खेळी केली. यासह त्याने आयपीएल कारकिर्दीत ३५० षटकार पूर्ण केले आहेत. हा पराक्रम करणारा तो पहिलाच क्रिकेटपटू ठरला आहे. यापूर्वी कोणालाही आयपीएलमध्ये ३५० षटकार मारता आलेले नव्हते.
विशेष म्हणजे आयपीएलमध्ये सर्वाधिक षटकार मारणाऱ्या फलंदाजांच्या यादीत दुसऱ्या क्रमांकावर असलेला एबी डिविलियर्स आणि गेलमध्ये जवळपास १२० पेक्षा अधिक षटकारांचे अंतर आहे. म्हणजेच गेलच्या जवळपासह कोणी नाही. डिविलियर्सने आत्तापर्यंत २३७ षटकार मारले आहेत. म्हणजे गेल्याव्यतिरिक्त अन्य कोणाला २५० षटकारांचाही टप्पा अद्याप ओलांडता आलेला नाही.
गेलने आयपीएलमध्ये आत्तापर्यंत १३३ सामने खेळले असून ४१.१२ च्या सरासरीने ४८१२ धावा केल्या आहेत. यात त्याच्या ३८८ चौकारांचा आणि ३५१ षटकारांचा समावेश आहे.
सध्या सर्वाधिक षटकार मारणाऱ्या फलंदाजांच्या यादीत गेल आणि डिविलियर्स पाठोपाठ तिसऱ्या क्रमांकावर २१६ षटकारांसह एमएस धोनी आहे. तर २१४ षटकारांसह रोहित शर्मा चौथ्या आणि २०१ षटकारांसह विराट कोहली पाचव्या क्रमांकावर आहे. विशेष म्हणजे आत्तापर्यंत या ५ फलंदाजांनाच २०० किंवा त्यापेक्षा अधिक षटकार मारता आले आहेत.
महत्त्वाच्या बातम्या –
पंजाबला घाम फोडणारी शतकी खेळी करणाऱ्या संजू सॅमसनने केला मोठा रेकॉर्ड, बनला पहिलाच कर्णधार
वाह राहुल! तेवतियाने घेतला बाऊंड्री लाईनवर डोळे दिपवणारा झेल, पाहा व्हिडिओ
अविश्वसनीय! चेतन सकारियाने आयपीएल पदार्पणातच घेतला डोळ्यांचे पारणे फेडणारा भन्नाट झेल
