भारत आणि श्रीलंकेच्या (India vs Srilanka) संघात दोन सामन्यांच्या कसोटी मालिकेतील दुसरा सामना कोलंबोच्या एसएससी मैदानावर खेळला गेला. या सामन्यात बऱ्याच वेळेस टीम इंडियाचं पारडं जड होतं, पण शेवटच्या दिवशी श्रीलंकेच्या फलंदाजांनी केलेल्या दमदार कामगिरीमुळे सामना अनिर्णित (ड्रॉ) राखण्यात महत्त्वाची भूमिका बजावली.
या सामन्यात श्रीलंकेला फॉलोऑनचा सामना करावा लागला होता, मात्र त्यानंतर दुसऱ्या डावात सोनल दिनुशाच्या शतकीय खेळीने त्यांना मानहानीकारक पराभवापासून वाचवले. हा सामना ड्रॉ झाल्यामुळे टीम इंडियाचा कर्णधार शुबमन गिलच्या (Shubman gill) नावावर एक नकोसा रेकॉर्ड नोंदवला गेला, जो याआधी कोणत्याही भारतीय कर्णधाराच्या नावावर नव्हता. श्रीलंका संघाला फॉलोऑन दिल्यानंतरही कसोटी सामन्यात विजय मिळवू न शकणारा गिल हा भारताचा पहिलाच कर्णधार ठरला आहे.
गॉल कसोटी सामन्यात दारुण पराभव पत्करावा लागल्यानंतर श्रीलंकेने कोलंबो कसोटीत ज्या प्रकारे सुरुवात केली होती, त्यावरून ते हा सामना वाचवण्यात यशस्वी ठरतील अशी कोणालाही अपेक्षा नव्हती. या सामन्यात भारतीय संघाने पहिल्या डावात 503 धावा करून डाव घोषित केला होता. त्यानंतर श्रीलंकेचा संघ पहिल्या डावात 290 धावांवर गारद झाला, ज्यामुळे त्यांना फॉलोऑन स्वीकारावा लागला.
दुसऱ्या डावातही चौथ्या दिवसाचा खेळ संपताना श्रीलंकेने आपल्या 6 विकेट गमावल्या होत्या, ज्यामुळे त्यांचा पराभव निश्चित दिसत होता. मात्र, पाचव्या दिवशी सोनल दिनुशाच्या शानदार शतकी खेळीने हा सामना अनिर्णित (ड्रॉ) संपवला. शुबमन गिलपूर्वी भारताच्या ज्याही कर्णधारांनी कसोटीत श्रीलंकेला फॉलोऑन दिला होता, त्यांना त्या प्रत्येक सामन्यात विजय मिळवण्यात यश आले होते, पण गिलला ही कामगिरी करता आली नाही.
श्रीलंकेला फॉलोऑन दिल्यानंतर टीम इंडियासाठी सामन्याचे निकाल:
- वर्ष 1987- कटक, विजय (कर्णधार कपिल देव)
- वर्ष 1990 – चंदीगड, विजय (कर्णधार मोहम्मद अझरुद्दीन)
- वर्ष 1994 – लखनौ, विजय (कर्णधार मोहम्मद अझरुद्दीन)
- वर्ष 1994 – बंगळुरू, विजय (कर्णधार मोहम्मद अझरुद्दीन)
- वर्ष 2009 – कानपूर, विजय (कर्णधार एमएस धोनी)
- वर्ष 2017 – कोलंबो, विजय (कर्णधार विराट कोहली)
- वर्ष 2017 – पल्लेकेले, विजय (कर्णधार विराट कोहली)
- वर्ष 2022 – मोहाली, विजय (कर्णधार रोहित शर्मा)
- वर्ष 2026 – कोलंबो, ड्रॉ (कर्णधार शुबमन गिल)
कोलंबो कसोटी अनिर्णित राखल्यानंतर श्रीलंकेचा संघ कसोटी क्रिकेटच्या इतिहासात चौथ्यांदा फॉलोऑन मिळाल्यानंतर सामना ड्रॉ करण्यात यशस्वी ठरला आहे. याआधी त्यांनी 16 वर्षांपूर्वी गालीच्या मैदानावर वेस्ट इंडिजविरुद्ध अशी कामगिरी केली होती. कसोटी क्रिकेटच्या इतिहासामध्ये आतापर्यंत श्रीलंकेच्या संघाना 28 वेळा फॉलोऑनचा सामना करावा लागला आहे. त्यापैकी 24 सामन्यांत त्यांना पराभव पत्करावा लागला, तर 4 सामने ते ड्रॉ राखण्यात यशस्वी ठरले आहेत.
फॉलोऑन मिळाल्यानंतर श्रीलंकेने ड्रॉ केलेले सामने
- विरुद्ध झिम्बाब्वे – वर्ष 1994, बुलवायो
- विरुद्ध इंग्लंड – वर्ष 2006, लॉर्ड्स
- विरुद्ध वेस्ट इंडिज – वर्ष 2010, गाली
- विरुद्ध भारत – वर्ष 2026, कोलंबो
