मंगळवार हा दिवस युवा ऑस्ट्रेलियन अष्टपैलू खेळाडू कूपर कॉनलीसाठी एक अविस्मरणीय दिवस ठरला. त्याने आयपीएलमध्ये पदार्पण केले. शिवाय आपल्या पहिल्याच सामन्यात मॅच विनिंग खेळी साकारली. विशेष म्हणजे, पंजाब किंग्जला गुजरात टायटन्सविरुद्ध विजय मिळवून देण्यात मदत केल्यानंतर अवघ्या काही तासांतच त्याला एक वाईट बातमी मिळाली. आज बुधवारी, या ऑस्ट्रेलियन आणि पंजाब किंग्जच्या अष्टपैलू खेळाडूला क्रिकेट ऑस्ट्रेलियाच्या केंद्रीय करार यादीतून वगळण्यात आले. आपल्या राष्ट्रीय संघासाठी टी-२० मध्ये चांगली कामगिरी करण्यात तो अपयशी ठरला होता.
ऑस्ट्रेलियन निवड समितीने त्याची क्षमता सुरुवातीच्या काळातच ओळखली होती. गेल्या १८ महिन्यांत, त्याला कसोटी पदार्पण करण्याची आणि व्हाइट-बॉल क्रिकेटमधील अनेक सामने खेळण्याची संधी मिळाली होती. ११ टी-२० आंतरराष्ट्रीय सामन्यांमध्ये केवळ ४.६६ च्या सरासरीने २८ धावा केल्यामुळे, त्याचा करार गमावणे जवळजवळ अटळच होते. कॉनली आणि सॅम कॉनस्टास हे अशा युवा क्रिकेटपटूंपैकी आहेत ज्यांना २०२६-२७ च्या केंद्रीय करार यादीतून वगळण्यात आले आहे. क्रिकेट ऑस्ट्रेलियाने आपल्या करारबद्ध खेळाडूंची यादी कमी करून २१ पर्यंत आणली आहे. पुढील १२ महिन्यांत २१ कसोटी सामन्यांचा समावेश असलेल्या व्यस्त वेळापत्रकाच्या पार्श्वभूमीवर हा निर्णय घेण्यात आला.
प्रसिद्ध कृष्णाच्या (३/२९) उत्कृष्ट गोलंदाजीमुळे पंजाबच्या डावाची सुरुवात डळमळीत झाली होती. तरीही, संघाने पुन्हा एकजूट दाखवली आणि पाच चेंडू बाकी असताना १६३ धावांचे लक्ष्य यशस्वीरित्या गाठले. कॉनली आणि प्रभसिमरन सिंग (२४ चेंडूंत ३७ धावा) यांनी दुसऱ्या गड्यासाठी ७६ धावांची महत्त्वपूर्ण भागीदारी रचून गुजरात टायटन्सविरुद्धच्या विजयाचा पाया रचला. साम्यानंतर बोलताना कॉनली म्हणाला, “मला काही जागतिक दर्जाच्या खेळाडूंसोबत खेळण्याचा अनुभव घ्यायचा होता आणि आज मी केलेल्या कामगिरीबद्दल मला अत्यंत आनंद होत आहे.”
त्याने पुढे सांगितले, “यापूर्वी, स्वतःला पुन्हा ताजेतवाने करण्यासाठी मी मित्र आणि कुटुंबासोबत घरी काही वेळ घालवला होता. मी स्वतःला एक टेम्पो खेळाडू मानतो. मोठे षटकार मारण्याचा प्रयत्न करण्यापेक्षा, मी माझ्या हातांच्या नैसर्गिक प्रवाहावर लक्ष केंद्रित करतो. रिकीसोबत काम करण्याचा अनुभव अप्रतिम राहिला आहे.”
