मुलगा झोरावरच्या आठवणीने व्याकूळ झालेला ‘गब्बर’, भेटल्यानंतर कडकडून मारली मिठी, चाहतेही झाले व्यक्त

भारतीय क्रिकेट संघाचा जबरदस्त फलंदाज शिखर धवन याला ‘गब्बर’ म्हणूनही ओळखले जाते. नुकतेच आयपीएलचा १५वा हंगाम पार पडला. या स्पर्धेत धवनची बॅट चांगलीच तळपली. त्याने ४०० हून अधिक धावा चोपल्या. इतकी चांगली कामगिरी करूनही त्याला दक्षिण आफ्रिकेविरुद्धच्या टी२० मालिकेसाठी भारतीय संघात स्थान मिळाले नाही. त्याच्या जागी सलामीवीर फलंदाज म्हणून इशान किशन आणि ऋतुराज गायकवाड यांना संधी मिळाली आहे. यावर्षी टी२० विश्वचषक होणार आहे. अशात प्रशिक्षक राहुल द्रविड याला युवा खेळाडूंना जास्तीत जास्त संधी द्यायची आहे. अशातच आता आयपीएल गाजवणाऱ्या धवनला त्याचा मुलगा झोरावर याची आठवण येतेय. त्यासाठी तो त्याला भेटायलाही पोहोचलाय.

शिखर धवन (Shikhar Dhawan) याने त्याच्या अधिकृत सोशल मीडिया अकाऊंटवर मुलगा झोरावर (Zoravar) याच्यासोबतचा फोटो शेअर केला आहे. तसेच, त्याने लिहिले आहे की, “खूप आठवण आली, मुलाला भेटून आनंद होतोय.” खरं तर झोरावर हा त्याची आई आयशा धवन (Ayesha Dhawan) हिच्यासोबत राहतोय. धवन आणि आयशाचा घटस्फोट झाला आहे. धवनच्या या पोस्टवर चाहते कमेंट करत त्यांच्या भावना व्यक्त करत आहेत.

https://www.instagram.com/p/CeYS3MZu7SM/?utm_source=ig_web_copy_link

एका चाहत्याने कमेंट करत लिहिले की, “मुलापासून दूर असणे किती कठीण असते. हे काळजाचे तुकडे-तुकडे करून टाकते.” दुसऱ्या एका चाहत्याने लिहिले की, “ज्युनिअर गब्बर.” धवनबद्दल सांगायचं झालं, तर तो आयपीएलदरम्यानही सोशल मीडियावर चांगलाच सक्रिय होता. त्याने फोटो आणि व्हिडिओही शेअर केले होते.

वनडे संघात मिळू शकते स्थान
शिखर धवनला टी२० संघात जागा मिळाली नसली, तरी तो वनडे संघात स्थान मिळवू शकतो. टीम इंडियाला पुढील महिन्यात इंग्लंडविरुद्ध तीन सामन्यांची मालिका खेळायची आहे. याशिवाय जुलैमध्ये संघाला वेस्ट इंडिज दौऱ्यावर ३ वनडे सामने खेळायचे आहेत. पुढील वर्षी एकदिवसीय विश्वचषक भारतातच होणार आहे. अशा स्थितीत धवन संघासाठी महत्त्वाचा ठरू शकतो. त्याने १४९ वनडे सामन्यांमध्ये ४५.५४च्या सरासरीने ६२८४ धावा चोपल्या आहेत. त्याने या धावा करताना १७ शतके आणि ३५ अर्धशतके केली आहेत.