याला म्हणतात आगीत तेल ओतणे! इंग्लिश दिग्गजाने उचलून धरला कोहलीचा मुद्दा, सामना बंदीची केली मागणी

भारतीय संघाचा कर्णधार विराट कोहली सध्या मोठा अडचणीत सापडणार असल्याची शक्यता आहे. भारत विरुद्ध इंग्लंडच्या कसोटी मालिकेतील दुसरा कसोटी सामना चेन्नईतील एमए चिदंबरम स्टेडियमच्या मैदानावर झाला. या सामन्यात भारताने ३१७ धावांनी विजय मिळवला. मात्र या सामन्याच्या तिसऱ्या दिवशी विराटने पंच नितिन मेनन यांच्याशी वाद घातला. त्यामुळे शिक्षा म्हणून त्याच्यावर एका सामन्याची बंदी घालण्यात येण्याची चिन्हे आहेत. अशात इंग्लंडचे माजी क्रिकेटपटू डेविड लॉयड यांनी याच मुद्द्यावरुन विराटवर निशाणा साधला आहे.

लॉयड यांनी डेली मेल वृत्तपत्रातील आपल्या कॉलममध्ये लिहिले की, ‘दुसऱ्या कसोटी सामन्यातील पंचांसोबतच्या दुर्व्यहारासाठी विराटला लाल कार्ड द्यायला पाहिजे होते. परंतु त्याच्याविरोधात कोणत्याही कारवाई संदर्भात कसलीही चर्चा होत नाहीये. यामुळे मी अचंबित झालो आहे. सोबतच मला या गोष्टीचे वाईटही वाटत आहे. एका राष्ट्रीय संघाच्या कर्णधाराला चालू सामन्यात एका अधिकाऱ्यावर टिका करणे, त्यांना मोठ्या आवाजात बोलणे, त्यांचा विरोध करणे याची परवानगी नाही.’

‘असे असतानाही त्याला मैदानाबाहेर न करता दुसऱ्या कसोटी सामन्यात खेळवण्यात आले. जर इतर कोणता खेळ असता, तर त्या व्यक्तिला तेव्हाच मैदानाबाहेर करण्यात आले असते. विराटने निश्चितपणे येत्या तिसऱ्या कसोटी सामन्यात खेळू नये,’ असे त्यांनी पुढे लिहिले.

तसेच शेवटी लिहताना त्यांनी म्हटले की, ‘सामान्य जनतेला क्रिकेटपटूंच्या कोणत्याही चुकीचे गांभीर्य समजून देण्यासाठी पिवळे आणि लाल कार्ड देण्याची प्रथा सुरू करायला हवी. विराटला तर सरळ लाल कार्ड मिळायला हवे. याचा अर्थ असा होईल की, तो पुढील तिसऱ्या कसोटी सामन्यातून बाहेर होईल. सामना रेफरी जवागल श्रीनाथ यांनी या मुद्द्यावर कसलेही भाष्य केलेले नाही. ते आपल्या खोलीत मजेत आराम करत आहेत. या प्रकरणाला साडे तीन दिवस लोटले, तरी त्यांच्या तोंडून शब्द निघाला नाही.’