दक्षिण आफ्रिका आणि आयर्लंड यांच्यात डब्लिन (मलाहायडे) मधील वनडे मालिकेच्या तिसर्‍या सामन्यात दक्षिण आफ्रिकेच्या संघाच्या सलामीवीरांची जोरदार फटकेबाजी केली. नाणेफेक जिंकल्यानंतर दक्षिण आफ्रिकेच्या दोन्ही सलामीवीरांनी (क्विंटन डी कॉक आणि जानमन मलान) शानदार शतके ठोकली आणि दक्षिण आफ्रिकेसाठी वनडे क्रिकेटमधील सलामीच्या भागीदारीचा नवा विक्रमही बनविला. हा सामना दक्षिण आफ्रिकेने ७० धावांनी जिंकला. त्यामुळे मालिका १-१ अशी बरोबरीत सुटली.
डी कॉक आणि मलानची दमदार फलंदाजी
प्रथम फलंदाजीस आलेल्या सलामीवीर क्विंटन डी कॉक आणि जानमन मलान यांनी सुरवातीपासूनच दणदणीत फलंदाजी केली. सातवा वनडे सामना खेळणार्‍या मलानने १२६ चेंडूत आपले दुसरे वनडे शतक झळकावले. दुसरीकडे अनुभवी डी कॉकने ८३ चेंडूमध्ये १६ वे वनडे शतक पूर्ण केले.
संघाच्या २२५ धावा झाल्या असताना सिमी सिंगने डी कॉकला बाद करत आयर्लंडला पहिले यश मिळवून दिले. डी कॉकने बाद होण्यापूर्वी ९१ चेंडूत ५ षटकार आणि ११ चौकार लगावत १२० धावांची खेळी केली. तर, मलानने त्याच्या कारकिर्दीतील सर्वोत्तम खेळी साकारताना नाबाद १७७ धावा केल्या.
विदेशी भूमीवर बनविला विक्रम
यासह या सलामी जोडीने दक्षिण आफ्रिकेसाठी परदेशी भूमीवर दुसऱ्या क्रमांकाची सर्वाच्च भागीदारी नोंदवली. २००० साली भारताविरुद्ध हर्शल गिब्स आणि गॅरी कर्स्टन यांच्यातील २३५ धावांच्या विक्रमी भागीदारीपासून ही जोडी अवघ्या दहा धावा दूर राहिली. या दरम्यान, डी कॉक व मलान जोडीने २००५ मध्ये भारताविरुद्ध ग्रॅमी स्मिथ आणि अँड्र्यू हॉल यांनी बनवलेला नाबाद १८९ धावांचा विक्रम मागे सोडला.
दक्षिण आफ्रिकेचा धावांचा डोंगर
मलान आणि डी कॉक यांच्या विक्रमी भागीदारीमुळे दक्षिण आफ्रिकेने ४ बाद ३४६ धावा उभ्या केल्या. आयर्लंडसाठी जोशुआ लिटील याने दोन बळी मिळवले.
आयर्लंडच्या सिमी सिंगचे शतक व्यर्थ
दक्षिण आफ्रिकेने दिलेल्या ३४७ धावांच्या आव्हानाचा पाठलाग करताना आयर्लंडने ९२ धावांवर ६ विकेट्स गमावल्या होत्या. मात्र, त्यानंतर ८ व्या क्रमांकावर फलंदाजीला आलेल्या सिमी सिंगने आयर्लंडकडून एकाकी झुंज दिली होती. त्याला कर्टिस कँफरची साथ मिळाली, पण तो ५४ धावा करुन माघारी परतला. त्यानंतरही सिमी सिंगने लढत दिली मात्र, अखेरच्या विकेट्स नियमित अंतराने पडल्याने आयर्लंडला ४७.१ षटकांत सर्वबाद २७६ धावाच करता आल्या. तरी, सिमी सिंगने ९१ चेंडूत १४ चौकारांसह १०० धावांची नाबाद खेळी केली.
तीन सामन्यांच्या मालिकेतील पहिला सामना पावसामुळे रद्द करण्यात आला होता. तर, दुसरा सामना आयर्लंडने अनपेक्षितरित्या जिंकला होता. तर आता तिसरा सामना दक्षिण आफ्रिकेने जिंकल्याने मालिका १-१ अशी बरोबरीत सुटली.
महत्त्वाच्या बातम्या –
“धोनी नेहमीच संघात असणार नाही, कुलदीपला स्वत:चा मार्ग शोधावा लागेल”
