फलंदाजांनो सावधान! एक वर्षानंतर पून्हा धडाडणार स्टेन गन

12 फेब्रुवारीपासून दक्षिण आफ्रिका विरुद्ध इंग्लंड संघात 3 सामन्यांच्या टी20 मालिकेला सुरुवात होणार आहे. या मालिकेसाठी आज(8 फेब्रुवारी) दक्षिण आफ्रिका संघाची घोषणा करण्यात आली आहे. या मालिकेसाठी दक्षिण आफ्रिकेचा अनुभवी वेगवान गोलंदाज डेल स्टेनचे संघात पुनरागमन झाले आहे.

स्टेनने त्याचा शेवटचा आंतरराष्ट्रीय सामना मागीलवर्षी मार्चमध्ये खेळला आहे. तो मागील काही महिन्यांपूर्वी दुखापतीमुळे त्रस्त होता. त्याला खांद्याच्या दुखापतीमुळे 2019 विश्वचषकातूनही एकही सामना न खेळता बाहेर पडावे लागले होते.

त्यानंतर त्याने मर्यादीत षटकांच्या क्रिकेटवर लक्ष्य केंद्रित करण्यासाठी ऑगस्टमध्ये कसोटी क्रिकेटमधून निवृत्ती घेतली होती.

यानंतर त्याने मझांसी सुपर लीग आणि बीग बॅश लीगमध्ये चांगली कामगिरी करत त्याची तंदुरुस्ती सिद्ध केली आहे. त्याने मझांसी सुपर लीगमध्ये 15.13 च्या इकोनॉमी रेटने 15 विकेट्स घेतल्या. तर बीग बॅश लीगमध्ये त्याने 4 सामन्यात 5 विकेट्स घेतल्या. त्यामुळे आता त्याचे दक्षिण आफ्रिकेच्या संघात पुनरागमन झाले आहे.

तसेच दक्षिण आफ्रिकेने नियमित कर्णधार फाफ डू प्लेसिस आणि वेगवान गोलंदाज कागिसो रबाडा यांच्या विश्रांतीच्या कालावधीत वाढ केली असल्याने त्यांचा इंग्लंड विरुद्धच्या टी20 मालिकेसाठी संघ निवड करताना विचार केलेला नाही.

डू प्लेसिस ऐवजी क्विंटॉन डी कॉककडे इंग्लंड विरुद्धच्या टी20 मालिकेसाठी दक्षिण आफ्रिकेच्या संघाचे नेतृत्व सोपवले आहे. डीकॉकला काही दिवसांपूर्वीच दक्षिण आफ्रिकेच्या वनडे संघाचे नियमित कर्णधारपद देण्यात आले आहे.