बीसीसीआयच्या निवड समितीने न्यूझीलंडविरुद्धच्या आगामी तीन सामन्यांच्या एकदिवसीय मालिकेसाठी संघ जाहीर केला आहे. नियमित कर्णधार शुबमन गिल आणि उपकर्णधार श्रेयस अय्यर या मालिकेसाठी संघात परतले आहेत. अय्यर अद्याप पूर्णपणे तंदुरुस्त नाही आणि फिटनेस चाचणी उत्तीर्ण झाल्यानंतरच त्याला एकदिवसीय मालिकेत खेळण्याची परवानगी दिली जाईल. मालिका जाहीर होण्यापूर्वी, विजय हजारे ट्रॉफीमध्ये चांगली कामगिरी करणाऱ्या खेळाडूंना एकदिवसीय मालिकेसाठी संघात समाविष्ट केले जाऊ शकते अशी अटकळ होती, परंतु अद्याप याची पुष्टी झालेली नाही.
विजय हजारे ट्रॉफी 2025-26 मध्ये, एक खेळाडू आहे ज्याची बॅट धुमाकूळ घालत आहे, परंतु कोणीही त्याच्याबद्दल बोलत नाही. तो खेळाडू म्हणजे देवदत्त पडिक्कल. विजय हजारे ट्रॉफीमध्ये पडिक्कल शानदार फाॅर्ममध्ये आहे. या स्पर्धेत त्याने आतापर्यंत पाच सामने खेळले आहेत, ज्यामध्ये चार शतके झळकावली आहेत शिवाय 102.8 च्या सरासरीने 514 धावा केल्या आहेत. तरीही, त्याला एकदिवसीय मालिकेसाठी टीम इंडियाच्या संघात स्थान मिळालेले नाही.
देवदत्त पडिक्कलचा विजय हजारे ट्रॉफीमधील रेकॉर्ड सुरुवातीपासूनच प्रभावी आहे. या स्टायलिश डावखुऱ्या फलंदाजाने या स्थानिक स्पर्धेत 33 सामने खेळले आहेत, 94.74 च्या सरासरीने 2525 धावा केल्या आहेत. या दरम्यान, त्याने 12 शतकांसह 25 डावांमध्ये 50+ धावा केल्या आहेत. या प्रभावी विक्रमानंतरही, देवदत्त पडिक्कलने अद्याप एकदिवसीय पदार्पण केलेले नाही. पडिक्कलने आधीच भारतासाठी कसोटी आणि टी-20 पदार्पण केले आहे.
पडिक्कलची सर्व 13 शतके विजय हजारे ट्रॉफीमध्येच झाली आहेत. यासह, तो स्पर्धेच्या इतिहासात सर्वाधिक शतके करणारा तिसरा खेळाडू बनला आहे. शतकांच्या बाबतीत त्याने कर्नाटकचा सध्याचा कर्णधार मयंक अग्रवाल (12) याला मागे टाकले. विजय हजारे ट्रॉफीमध्ये सर्वाधिक शतके करणाऱ्या खेळाडूंच्या यादीत आता फक्त अंकित बावणे आणि ऋतुराज गायकवाड हे देवदत्त पडिक्कलच्या पुढे आहेत. बावणेने या स्पर्धेत 15 शतके केली आहेत आणि ऋतुराजने १४ शतके केली आहेत. पडिक्कल भविष्यात या दोन्ही खेळाडूंना मागे टाकू शकतो.
