वेस्ट इंडिज आणि ऑस्ट्रेलिया यांच्यात ५ टी-२० सामन्यांच्या मालिकेतील दुसरा सामना रविवारी (११ जुलै) पार पडला. या सामन्यात वेस्ट इंडिज संघाने ५६ धावांनी विजय मिळवला आहे. या सामन्यात वेस्ट इंडिज संघाचा अष्टपैलू खेळाडू ड्वेन ब्रावोने तुफान फटकेबाजी केल्याचे पाहायला मिळाले आहे. या खेळीदरम्यान त्याने एक अप्रतिम शॉट लगावला होता, ज्याचा व्हिडिओ सध्या सोशल मीडियावर प्रचंड व्हायरल होत आहे.
या सामन्यात ऑस्ट्रेलिया संघाने नाणेफेक जिंकून प्रथम गोलंदाजी करण्याचा निर्णय घेतला होता. प्रथम फलंदाजी करताना वेस्ट इंडिज संघातील फलंदाजांनी २० षटकअखेर ४ बाद १९६ धावा केल्या होत्या. यामध्ये शिमरोन हेटमायरने अवघ्या ३६ चेंडूत ६१ धावांची खेळी केलं होती. तसेच ड्वेन ब्रावोने देखील तुफान फटकेबाजी करत नाबाद ४७ धावांची खेळी केली होती. लेंडल सिमन्सनेही ३० धावांचे बहुमूल्य योगदान दिले होते.
ड्वेन ब्रावोचा आगळा वेगळा शॉट
पहिल्या डावातील १३ व्या षटकात गोलंदाजी करण्यासाठी एश्टन एगर आला होता. त्याने या षटकातील चौथा चेंडू शॉर्ट पीच चेंडू टाकला होता, ज्यावर ड्वेन ब्रावोने जोरदार आक्रमण केले होते. त्याने या चेंडूवर एका हाताने गगनचुंबी षटकार लगावला होता. त्याच्या या षटकाराचा चेंडू थेट स्टेडियमबाहेर जाऊन पडला होता. एका हाताने फटका मारुनही चेंडू इतक्या दूर गेल्याचे पाहून गोलंदाज एश्टन एगरने आश्चर्यचकित होत तोंडात बोटे घातली.
Bravo with a classic one-handed six 💥pic.twitter.com/NgL9KWgofc
— ESPNcricinfo (@ESPNcricinfo) July 11, 2021
ऑस्ट्रेलियन संघाचा डाव १४० धावांवर आटोपला
वेस्ट इंडिज संघाने दिलेल्या १९७ धावांचा पाठलाग करताना ऑस्ट्रेलिया संघाला साजेशी सुरुवात करण्यात अपयश आले होते. संघातील सलामीवीर फलंदाज लवकर माघारी परतले होते. त्यानंतर मिचेल मार्शने एकहाती झुंज दिल्याचे पाहायला मिळाले होते. मार्शने ४२ चेंडूत ५४ धावांची खेळी केली होती. यामध्ये ५ चौकार आणि १ षटकाराचा समावेश होता. इतर कुठल्याही फलंदाजाला साजेशी कामगिरी करण्यात अपयश आले होते. ऑस्ट्रेलियन संघाचा डाव १९.२ षटकात संपुष्टात आला होता. या सामन्यात वेस्ट इंडिज संघाने ५६ धावांनी विजय मिळवत मालिकेत २-० ने आघाडी घेतली आहे.
महत्वाच्या बातम्या-
कोपा अमेरिका: अंतिम सामन्यात अर्जेंटिनाचा ब्राजीलवर १-०ने विजय, २८ वर्षांच्या प्रतिक्षेवर अंकुश
हरलीन देओलच्या झेलाचा ‘मास्टर-ब्लास्टर’ सचिनही झाला फॅन; ‘या’ शब्दात केले कौतुक
श्रीलंकेचा आणखी एक खेळाडू सापडला कोरोनाबाधित, नुकताच झाला होता वरिष्ठ संघात सामील
