मुंबई । साऊथॅम्प्टनमध्ये पहिली कसोटी गमावलेल्या इंग्लंड संघाने वेस्ट इंडिजला मँचेस्टर कसोटीत कडवे आव्हान दिले. दुसर्‍या कसोटीच्या पहिल्या डावात इंग्लंडने 9 विकेट्सवर 469 धावा केल्या. इंग्लंडने मोठी धावसंख्या गाठल्यानंतर कर्णधार जो रूटने डाव घोषित केला. इंग्लंडकडून बेन स्टोक्स आणि डॉम सिब्ली यांनी शानदार शतकी खेळी खेळली. स्टोक्सने सर्वाधिक 176 धावा केल्या तर सिब्लीने 120 धावांची नाबाद खेळी साकारली.
सिब्ले आणि स्टोक्स यांच्यातील 260 धावांच्या मॅरेथॉन भागिदारीमुळे इंग्लंडला भक्कम धावसंख्या उभारण्यास मदत झाली. तथापि, स्टोक्स आणि सिब्लेच्या शतकी खेळी दरम्यान विंडीजचा फिरकीपटू रोस्टन चेसनेही आश्वासक कामगिरी बजावली.
ऑफस्पिनर रोस्टन चेसने पहिल्या डावात 172 धावा देऊन 5 बळी घेतले. मॅनचेस्टरच्या मैदानावर 70 वर्षानंतर विंडीजच्या फिरकी गोलंदाजाने एका डावात 5 बळी घेतले आहेत. यापूर्वी सन 1950 मध्ये ए.एल. व्हॅलेंटाईनने मँचेस्टर मैदानावर पाच गडी बाद केले. चेसने कारकिर्दीतील तिसर्‍यांदा डावात पाच विकेट्स घेतल्या आहेत. याआधी 7 वर्षांपूर्वी ग्रॅमी स्वानने या मैदानावर पाच विकेट्स घेतल्या होत्या. मॅनचेस्टरमध्ये रोस्टन चेस, रोरी बर्न्स, जॅक क्रोली, डॉम सिब्ले, ऑली पोप आणि सॅम करन यांना बाद केले.
रॉस्टन चेसने मँचेस्टर कसोटीत आणखी एक पराक्रम केला. चेसने इंग्लंडचा सलामीवीर रोरी बर्न्सला पहिल्या दिवशी पायचीत केले. इंग्लंडची ही पहिली विकेट होती जी खूप खास होती. वास्तविक पाहता 35 वर्षांनंतर मँचेस्टरमध्ये एका स्पिनरने कसोटी सामन्यातील पहिली विकेट घेतली होती. यापूर्वी 1985 मध्ये जॉन अंबुरेने ही कामगिरी केली होती. अ‍ॅशेस मालिकेमध्ये अंबुरेने ऑस्ट्रेलियाच्या केपलर वेसेल्सची विकेट घेतली.