आयपीएलच्या १३ व्या हंगामात काल(२२ सप्टेंबर) चेन्नई सुपर किंग्स विरुद्ध राजस्थान रॉयल्स संघात सामना पार पडला. या सामन्यात राजस्थान रॉयल्सने १६ धावांनी विजय मिळवला. हा त्यांचा या हंगामातील पहिला विजय होता.
या सामन्यात राजस्थानने चेन्नईला विजयासाठी २१७ धावांचे आव्हान दिले होते. या आव्हानाचा पाठलाग करताना चेन्नईला निर्धारित २० षटकात ६ बाद २०० धावाच करता आल्या. चेन्नईकडून फाफ डु प्लेसिसने सर्वाधिक ७२ धावांची खेळी केली. ही खेळी त्याने ३७ चेंडूत १ चौकार आणि ७ षटकारांच्या मदतीने केली. पण त्याची ही खेळी चेन्नईला विजय मिळवून देऊ शकली नाही.
फाफ डु प्लेसिसची आयपीएल कारकिर्दीतील ही तिसऱ्या क्रमांकाची सर्वोच्च वैयक्तिक खेळी होती. विशेष म्हणजे त्याने आयपीएलमध्ये केलेल्या पहिल्या ३ सर्वोच्च वैयक्तिक खेळींपैकी २ वेळा तो पराभूत संघाकडून खेळला होता. म्हणजेच कारकिर्दीतील सर्वोच्च खेळी करुनही त्याच्या संघाला पराभवाला सामोरे जावे लागले होते. २०१९ मध्ये किंग्स इलेव्हन पंजाबविरुद्ध त्याने ९६ धावांची खेळी केली होती. ही त्याची आयपीएलमधील सर्वोत्तम खेळी आहे. परंतु त्या सामन्यातही चेन्नई सुपर किंग्सचा संघ पराभूत झाला होता. तसेच त्याने जेव्हा २०१२ ला राजस्थान विरुद्धच ७३ धावांची खेळी केली होती, तेव्हा चेन्नई संघाला शेवटच्या चेंडूवर विजय मिळाला होता.
एवढेच नाही तर आंतरराष्ट्रीय टी२०मध्येही डु प्लेसिसने त्याच्या कारकिर्दीत केलेल्या पहिल्या ३ सर्वोच्च वैयक्तिक खेळींमध्ये तो पराभूत संघाचा भाग होता. डु प्लेसिसने २०१५ ला वेस्ट इंडिजविरुद्ध ११९ धावांची सर्वोच्च टी२० खेळी केली होती. परंतु त्यावेळीही दक्षिण आफ्रिकेला पराभवाचा सामना करावा लागला. तसेच २०१३ मध्ये जेव्हा त्याने श्रीलंकेविरुद्ध ८५ धावांची खेळी केली तेव्हाही दक्षिण आफ्रिदा पराभूत झाली होती. तर २०१६ मध्ये डु प्लेसिसने ऑस्ट्रेलियाविरुद्ध ७९ धावांची खेळी केली. तेव्हाही त्याला पराभवाचेच तोंड पहावे लागले. या तिन्ही खेळी डु प्लेसिसच्या आंतरराष्ट्रीय टी२० कारकिर्दीतील सर्वोत्तम खेळी आहेत.
#फाफ डु प्लेसिसच्या आंतरराष्ट्रीय टी२० कारकिर्दीतील सर्वोत्तम ३ खेळी –
११९ धावा विरुद्ध वेस्ट इंडिज, २०१५ (दक्षिण आफ्रिका पराभूत)
८५ धावा विरुद्ध श्रीलंका, २०१३ (दक्षिण आफ्रिका पराभूत)
११९ धावा विरुद्ध ऑस्ट्रेलिया, २०१६ (दक्षिण आफ्रिका पराभूत)
#फाफ डु प्लेसिसच्या आयपीएल कारकिर्दीतील सर्वोत्तम ३ खेळी –
९६ धावा विरुद्ध किंग्स इलेव्हन पंजाब, २०१९ (चेन्नई पराभूत)
७३ धावा विरुद्ध राजस्थान रॉयल्स, २०१२ (चेन्नईचा शेवटच्या चेंडूवर विजय)
७२ धावा विरुद्ध राजस्थान रॉयल्स, २०२० (चेन्नई पराभूत)
