‘जे कोणी असेल बंदी घाला…’, विराट-गंभीर अन् नवीन वादावर सेहवागचे रोखठोक विधान, वाचा सविस्तर

इंडियन प्रीमिअर लीग 2023 स्पर्धेतील 43वा सामना सोमवारी (दि. 1 मे) लखनऊ सुपर जायंट्स वि. रॉयल चॅलेंजर्स बेंगलोर संघात पार पडला. या सामन्यात बेंगलोर संघाने 18 धावांनी विजय मिळवला. मात्र, हा सामना झाल्यानंतर बेंगलोरचा स्टार क्रिकेटपटू विराट कोहली आणि लखनऊचा वेगवान गोलंदाज नवीन उल हक यांच्यात वाद झाला. हे प्रकरण इथेच थांबले नाही. लखनऊचा मार्गदर्शक गौतम गंभीर यानेही या वादात उडी घेतली. आता या प्रकरणावर भारतीय संघाचा माजी दिग्गज फलंदाज वीरेंद्र सेहवाग याने मोठे भाष्य केले आहे.

काय म्हणाला सेहवाग?
वीरेंद्र सेहवाग (Virender Sehwag) याने विराट कोहली आणि गौतम गंभीर (Virat Kohli And Gautam Gambhir) यांच्यातील वादावर तिखट प्रतिक्रिया व्यक्त केली. सेहवागने भविष्यात अशा घटना टाळण्यासाठी एका खेळाडूवर बंदी घातली पाहिजे, असे म्हटले. तो म्हणाला की, “जे काही झाले, ते योग्य नव्हते. जे हारले, त्यांनी गपगुमान पराभव मान्य केला पाहिजे होता. तसेच, जे जिंकले, त्यांनी विजयाचा आनंद साजरा करायला पाहिजे होता. कोणालाही भांडायचेच कशाला. हे लोक देशाचे आयकॉन आहेत. त्यांना लाखो मुलं फॉलो करतात.”

सेहवाग पुढे बोलताना म्हणाला की, “गरज पडली तर बीसीसीआय एका खेळाडूवर बंदीही घालू शकते. जे कोणी या घटनेत सामील होते, त्यांच्यापैकी एकावर बंदी घातली पाहिजे. जेणेकरून अशी भांडणे भविष्यात कधीच होणार नाहीत. असे वर्षभरात एकदा तरी पाहायला मिळतेच. मैदानावर या गोष्टी झाल्या नाहीत पाहिजे.”

विराटला भिडला गंभीर
लखनऊ सुपर जायंट्स संघाचा मार्गदर्शक गौतम गंभीर या सामन्यानंतर विराट कोहली याला भिडला. असे वाटत होते की, विराट आमि नवीनमध्ये झालेल्या वादाबाबत गंभीर समजावत आहे. मात्र, इथे गंभीरचेही नियंत्रण सुटले आणि त्याने विराटशी बाचाबाची केली. या दोन्ही खेळाडूंमध्ये लखनऊचे प्रशिक्षक विजय दहिया आणि कर्णधार केएल राहुल यांनाही मध्यस्थी करावी लागली.

सामन्याविषयी थोडक्यात
या सामन्याविषयी बोलायचं झालं, तर प्रथम फलंदाजी करताना बेंगलोर संघाने 126 धावा केल्या होत्या. या आव्हानाचा पाठलाग करताना लखनऊ संघाचा डाव 108 धावांवरच संपुष्टात आला होता. त्यामुळे हा सामना बेंगलोरने 18 धावांनी खिशात घातला. (former cricketer virender sehwag reacted to gautam gambhir vs virat kohli fight in lsg vs rcb ipl 2023)

महास्पोर्ट्सचा व्हॉट्सअप ग्रूप जॉईन करण्यासाठी येथे क्लिक करा
महास्पोर्ट्सचा टेलिग्राम ग्रूप जॉईन करण्यासाठी येथे क्लिक करा
महत्वाच्या बातम्या-
विराटला नडणाऱ्या नवीनला पाकिस्तानातून पाठिंबा; आफ्रिदी म्हणाला, ‘तो स्वत: आधी भांडतच…’
Video : जडेजाने टाकला IPLमधील आतापर्यंतचा सर्वोत्तम चेंडू, दांड्या उडताच स्टॉयनिसला 440 व्होल्टचा शॉक