India vs England: भारत आणि इंग्लंड यांच्यातील 5 सामन्यांची कसोटी मालिका 2-2 अशा बरोबरीसह संपली. भारतीय संघाने लंडनच्या केनिंग्टन ओव्हल मैदानावर खेळल्या गेलेल्या मालिकेतील शेवटच्या सामन्यात केवळ 6 धावांनी शानदार विजय मिळवत मालिका बरोबरीत सोडवण्यात यश मिळवले. या कसोटी मालिकेदरम्यान दोन्ही संघांकडून जोरदार शाब्दिक युद्धही पाहायला मिळाले. (India vs England Test Series)
यातील एक मुद्दा जो सर्वाधिक चर्चेत राहिला तो म्हणजे, सामन्यादरम्यान प्लेइंग 11 मधील कोणताही खेळाडू जखमी झाल्यास त्याच्या जागी दुसऱ्या खेळाडूला घेण्याची परवानगी दिली जावी. यावर इंग्लंडचा कर्णधार बेन स्टोक्सने एक विचित्र विधान केले होते, ज्यावर आता भारतीय संघाचा माजी खेळाडू रविचंद्रन अश्विनने त्याला सडेतोड उत्तर दिले आहे.
मँचेस्टरमध्ये खेळल्या गेलेल्या मालिकेतील चौथ्या सामन्यादरम्यान भारतीय संघाचा यष्टीरक्षक फलंदाज रिषभ पंत फलंदाजी करताना त्याच्या उजव्या पायाला दुखापत झाली होती. स्कॅन केल्यानंतर त्याच्या पायात फ्रॅक्चर असल्याचे निष्पन्न झाले, तरीही तो त्या कसोटी सामन्यात पहिल्या डावादरम्यान रिटायर्ड हर्ट झाल्यानंतरही नंतर फलंदाजीसाठी मैदानात उतरला होता. याच संदर्भात मँचेस्टर कसोटीदरम्यान भारतीय संघाच्या हेड कोचने जखमी खेळाडूच्या जागी दुसऱ्या खेळाडूला संधी देण्याबद्दल बोलले होते. जेव्हा बेन स्टोक्सला याबद्दल विचारण्यात आले तेव्हा त्याने याला चेष्टा म्हणून हसून सोडून दिले. (Substitute Player Rule Cricket)
आता अश्विनने स्टोक्सच्या याच वक्तव्यावर आपल्या यूट्यूब चॅनलवर म्हटले आहे की, “तमिळमध्ये एक म्हण आहे, ज्याचा सरळ अर्थ आहे की तुम्हाला तुमच्या कर्माचे फळ लगेच मिळते.”
अश्विन पुढे म्हणाला, “जेव्हा स्टोक्सला जखमी खेळाडूच्या जागी सामन्यादरम्यान दुसऱ्या खेळाडूला प्लेइंग 11 मध्ये समाविष्ट करण्याबद्दल विचारण्यात आले, तेव्हा त्याने ते खूप हलके घेतले. मी स्टोक्सच्या खेळाचा खूप मोठा चाहता आहे, परंतु त्याने या प्रश्नाचे उत्तर थोडे विचारपूर्वक द्यायला हवे होते. कारण तुम्ही जे पेरता तेच उगवते. तुम्हाला तुमचे विचार मांडण्याचे स्वातंत्र्य आहे, पण तुम्ही अशा विचारांना चेष्टा किंवा हास्यास्पद म्हणून सोडून देऊ शकत नाही.” (Ashwin on Stokes Statement)
