भारतीय महिला क्रिकेट संघाची कर्णधार हरमनप्रीत कौर (Harmanpreet Kaur) हिला ‘पद्मश्री’ पुरस्काराने सन्मानित करण्यात आले आहे. 25 मे रोजी भारताच्या राष्ट्रपती द्रौपदी मुर्मू (President Draupadi Murmu) यांच्या हस्ते तिला हा पुरस्कार प्रदान करण्यात आला. हरमनप्रीतशिवाय क्रीडा क्षेत्रातील इतर दिग्गज जसे की, हॉकीपटू सविता पुनिया आणि पॅरालिम्पिक सुवर्णपदक विजेता प्रवीण कुमार यांनाही या पुरस्काराने गौरवण्यात आले. खरं तर, भारत सरकारने प्रजासत्ताक दिनाच्या पूर्वसंध्येला (25 जानेवारी) 131 पद्म पुरस्कार विजेत्यांची घोषणा केली होती.
त्यानुसार, पहिल्या टप्प्यात देशातील 66 मान्यवरांना सन्मानित करण्यात आले, तर उर्वरित विजेत्यांना दुसऱ्या टप्प्यात पुरस्कार दिले जातील. केंद्र सरकारने जानेवारी 2026 मध्ये जेव्हा पद्म पुरस्कारांची घोषणा केली, तेव्हा त्यात क्रीडा क्षेत्रातील 9 मोठ्या खेळाडूंचा समावेश होता. त्या यादीत हरमनप्रीत कौरचेही नाव होते.
हरमनप्रीतला तिच्या उत्कृष्ट खेळासाठी आणि अप्रतिम कर्णधारपदासाठी हा सन्मान मिळाला आहे. तिच्यासाठी 2025 हे वर्ष अत्यंत खास राहिले, कारण तिच्याच नेतृत्वाखाली भारताने मायदेशात झालेला महिला वनडे वर्ल्ड कप जिंकून इतिहास रचला होता. या ऐतिहासिक विजयाने देशातील महिला क्रिकेटला एक नवी ओळख मिळवून दिली. या दिग्गजांचाही झाला सन्मान हरमनप्रीत कौरव्यतिरिक्त खालील अनेक दिग्गजांनाही या पुरस्काराने सन्मानित करण्यात आले आहे..
रोहित शर्मा (भारतीय क्रिकेट संघाचा माजी कर्णधार)
प्रवीण कुमार (पॅरालिम्पिक सुवर्णपदक विजेता हाय-जंपर)
सविता पुनिया (भारतीय महिला हॉकी संघाची गोलकीपर)
बलदेव सिंह, के. पजनीवेल आणि भगवानदास रायकवार (अनुभवी प्रशिक्षक/कोच)
व्लादिमीर मेस्तविरिशविली (मरणोपरांत पद्मश्री)
विजय अमृतराज (टेनिसपटू – ‘पद्मभूषण’ पुरस्कार)
रोहित शर्मा 25 मे रोजी होणाऱ्या या पुरस्कार सोहळ्यात सहभागी होईल, अशी चाहत्यांना आशा होती. मात्र, राष्ट्रपती द्रौपदी मुर्मू यांच्या हस्ते झालेल्या पहिल्या टप्प्यातील पुरस्कार विजेत्यांच्या यादीत रोहितचे नाव नव्हते. रोहितला आता दुसऱ्या टप्प्यात होणाऱ्या सोहळ्यात या पुरस्काराने सन्मानित केले जाईल. या दुसऱ्या सोहळ्याची अधिकृत तारीख अजून जाहीर झालेली नाही. काही कारणास्तव जे विजेते पहिल्या सोहळ्याला उपस्थित राहू शकत नाहीत, त्यांना दुसऱ्या सोहळ्यात सन्मानित केले जाते.
