भारतीय संघ सध्या दोन सामन्यांच्या कसोटी मालिकेसाठी श्रीलंका दौऱ्यावर आहे. 15 ऑगस्टपासून गॉल येथे दोन्ही संघांमधील कसोटी मालिकेतील पहिला सामना खेळवला जाईल. या मालिकेत भारतीय संघाचे नेतृत्व शुभमन गिल करणार आहे. कर्णधार गिलसमोर या मालिकेत एक नवे आव्हान असेल. कारण शुभमन गिल पहिल्यांदाच श्रीलंकेत कसोटी सामना खेळणार आहे. यापूर्वी त्याने श्रीलंकेविरुद्ध एकही कसोटी सामना खेळलेला नाही. श्रीलंका मालिकेपूर्वी कर्णधार म्हणून शुभमन गिलचा विक्रम कसा राहिला आहे, हे आपण जाणून घेऊया.
शुभमन गिलने आतापर्यंत एकूण 9 कसोटी सामन्यांमध्ये कर्णधारपद भूषवले आहे. या काळात भारतीय संघाने 5 सामने जिंकले आहेत, तर 3 सामन्यांत त्यांना पराभवाचा सामना करावा लागला आहे. तर एक सामना अनिर्णित राहिला आहे. भारतीय संघाने आपला शेवटचा कसोटी सामना याच वर्षी जूनमध्ये अफगाणिस्तानविरुद्ध खेळला होता. त्या सामन्यात भारतीय संघाने एक डाव आणि 300 धावांनी मोठा विजय नोंदवला होता. गिलने गेल्या वर्षीच्या इंग्लंड दौऱ्यापासून भारतीय संघाचे कर्णधारपद सांभाळले होते.
कर्णधार म्हणून शुभमन गिलची फलंदाजीतील कामगिरी अत्यंत शानदार राहिली आहे. त्याने आतापर्यंत कर्णधार असताना 9 कसोटी सामन्यांतील 15 डावांमध्ये 82.76 च्या उत्कृष्ट सरासरीने 1076 धावा केल्या आहेत. यादरम्यान त्याच्या बॅटमधून 6 शतके आणि 1 अर्धशतक आले आहे. एकंदरीत विचार केल्यास त्याने आतापर्यंत 41 कसोटी सामने खेळले असून 44.31 च्या सरासरीने 2969 धावा केल्या आहेत. गिलने आतापर्यंत 11 शतके आणि 8 अर्धशतके झळकावली आहेत. कसोटीत त्याची सर्वोच्च वैयक्तिक धावसंख्या 269 धावांची आहे.
श्रीलंका मालिकेबद्दल बोलायचे झाले तर, सराव सामन्यापूर्वी शुभमन गिलच्या बोटाला दुखापत झाली होती. या दुखापतीमुळे तो सराव सामन्याच्या पहिल्या दिवशी मैदानावर दिसला नव्हता. तसेच पहिल्या डावात त्याने फलंदाजीही केली नव्हती. परंतु, भारताच्या दुसऱ्या डावात गिल फलंदाजीसाठी मैदानात आला आणि त्याने 54 चेंडूंत 44 धावा केल्या. या खेळीदरम्यान त्याने 7 चौकार लगावले. भारतीय संघाने या सराव सामन्यात श्रीलंका इलेव्हनचा ६ गडी राखून पराभव केला
