एका अनपेक्षित निर्णयाद्वारे, ईस्ट झोनच्या निवड समितीने यंदाच्या दुलीप ट्राॅफी स्पर्धेसाठी वैभव सूर्यवंशीची उपकर्णधार म्हणून नियुक्ती केली आहे. ईशान किशनच्या नेतृत्वाखालील संघात, कारकिर्दीच्या अगदी सुरुवातीच्या टप्प्यावर असलेल्या 15 वर्षीय वैभव सूर्यवंशीवर इतकी मोठी जबाबदारी सोपवलेली पाहून अनेकांना आश्चर्य वाटले. काही चाहते आणि क्रिकेट तज्ज्ञांनी या निर्णयाचे स्वागत केले असले, तरी काहींना या धाडसी निर्णयामागचा तर्क समजला नाही. भारतीय समालोचक हर्ष भोगले यांनीही वैभवला, विशेषतः रेड-बॉल क्रिकेटमध्ये (प्रथम श्रेणी), नेतृत्वाची भूमिका देण्यामागच्या तर्कावर प्रश्नचिन्ह उपस्थित केले आहे.
‘ईस्ट झोन’च्या संघात स्थान मिळवणे ही वैभव सूर्यवंशीसाठी एक मोठी कामगिरी आहे. आयपीएल आणि आंतरराष्ट्रीय क्रिकेटमधील प्रभावी कामगिरीनंतर त्याच्या वेगाने होत असलेल्या प्रगतीमधील हा आणखी एक महत्त्वाचा टप्पा आहे. हा युवा खेळाडू आता रेड-बॉल प्रकारात स्वतःला सिद्ध करण्यास सज्ज आहे. दरम्यान हर्ष भोगले यांंनी यावर आपली प्रतिक्रिया दिली.
हर्ष भोगले यांनी ‘एक्स’वर लिहिले, “वरिष्ठ रेड-बॉल संघाचा उपकर्णधार म्हणून वैभव सूर्यवंशीची नियुक्ती करण्यामागचा विचार मला समजत नाही. त्याने 12 डावांत 17.25 च्या सरासरीने 207 धावा केल्या आहेत. त्याच्याकडे प्रचंड गुणवत्ता आहे, परंतु यात शिकण्याची प्रक्रिया समाविष्ट असते आणि ‘रेड-बॉल’ क्रिकेटमध्ये तो अजूनही त्या प्रक्रियेच्या सुरुवातीच्या टप्प्यावर आहे.”
त्यांनी पुढे म्हटले, “वैभव सूर्यवंशी बंगालचा अनुभवी फलंदाज अभिमन्यू ईश्वरन याच्यासोबत डावाची सुरुवात करेल अशी अपेक्षा आहे. जरी त्याने व्हाइट-बॉल क्रिकेटमध्ये स्वतःची वेगळी ओळख निर्माण केली असली, तरी फर्स्ट-क्लास क्रिकेटमधील त्याचा अनुभव मर्यादित आहे. त्याने आतापर्यंत आठ फर्स्ट-क्लास सामने खेळले आहेत, ज्यात त्याने 207 धावा केल्या असून त्याची सर्वोच्च धावसंख्या 93 आहे. दुलीप ट्राॅफी ही त्याच्यासाठी या दीर्घ स्वरूपाच्या क्रिकेटमध्ये आपली क्षमता अधिक चांगल्या प्रकारे सिद्ध करण्याची एक महत्त्वाची संधी असेल.”
दरम्यान, भारताचे अनुभवी वेगवान गोलंदाज मोहम्मद शमी आणि मुकेश कुमार यांचाही ईस्ट झोनच्या संघात समावेश करण्यात आला आहे, ज्यामुळे संघाची गोलंदाजी अधिक मजबूत झाली आहे.
ईस्ट झोन: ईशान किशन (कर्णधार), वैभव सूर्यवंशी (उपकर्णधार), अभिमन्यू ईश्वरन, सुदीप घारामी, मोहम्मद शमी, मुकेश कुमार, शाहबाज अहमद, सूरज जयस्वाल, विराट सिंग, कुमार कुशाग्रा, शिखर मोहन, शुभ्रांशू सेनापती, अभिजित सरकार, अनुकूल रॉय आणि देनिश दास
