जून महिन्यात भारता विरुद्धच्या तीन सामन्यांच्या एकदिवसीय मालिकेत 3-0 ने पराभव पत्करावा लागलेल्या अफगाणिस्तान क्रिकेट संघाबाबत एक मोठी बातमी समोर आली आहे. अफगाणिस्तानच्या एकदिवसीय संघाचा कर्णधार हशमतुल्ला शाहिदी याने तात्काळ प्रभावाने कर्णधारपदाचा राजीनामा दिला आहे.
55 एकदिवसीय सामन्यांमध्ये अफगाणिस्तानचे नेतृत्व करणाऱ्या शाहिदीने भारता विरुद्ध आपली शेवटची मालिका कर्णधार म्हणून खेळली, ज्यात संघाला 3-0 असा पराभव स्वीकारावा लागला. मात्र, कर्णधारपद सोडण्याचा निर्णय पूर्णपणे वैयक्तिक असल्याचे शाहिदीने स्पष्ट केले आहे.
डावखुरा फलंदाज हशमतुल्ला शाहिदी याने जानेवारी 2022 मध्ये अफगाणिस्तानच्या एकदिवसीय संघाचे नेतृत्व स्वीकारले होते. त्याच्या नेतृत्वाखाली अफगाणिस्तानने 2023 च्या एकदिवसीय विश्वचषकात प्रभावी कामगिरी केली. ग्लेन मॅक्सवेलच्या द्विशतकामुळे गाजलेल्या सामन्यात त्यांना ऑस्ट्रेलियाकडून पराभव पत्करावा लागला. जर त्यांनी तो सामना जिंकला असता, तर संघ उपांत्य फेरीत पोहोचला असता.
शाहिदीने चॅम्पियन्स ट्रॉफी आणि आशिया कप स्पर्धेतही अफगाणिस्तानचे नेतृत्व केले. त्याच्या नेतृत्वाखाली अफगाणिस्तानने 55 पैकी 27 एकदिवसीय सामने जिंकले. 2023 च्या विश्वचषकादरम्यान, संघाने इंग्लंड, पाकिस्तान, श्रीलंका आणि नेदरलँड्ससारख्या संघांविरुद्ध ऐतिहासिक विजय मिळवले.
कर्णधार म्हणून शाहिदीने बांगलादेश विरुद्ध तीन, झिम्बाब्वे विरुद्ध दोन आणि दक्षिण आफ्रिका व आयर्लंड विरुद्ध प्रत्येकी एका द्विपक्षीय एकदिवसीय मालिकेत संघाला विजय मिळवून दिला.
आपल्या इंस्टाग्राम अकाउंटवर राजीनाम्याबाबत निवेदन जारी करताना शाहिदी म्हणाला, “आज, अत्यंत आदर आणि परस्पर संमतीने, तसेच माझ्या वैयक्तिक निर्णयानुसार, मी संघाच्या कर्णधारपदाचा राजीनामा देत आहे. कर्णधार म्हणून संघाचे नेतृत्व करणे ही माझ्यासाठी खूप मोठी सन्मानाची गोष्ट होती. प्रामाणिकपणा, एकता आणि निष्ठेने संघासोबत काम केल्याचा मला अभिमान वाटतो.”
शाहिदीने स्पष्ट केले की, जरी तो कर्णधारपद सोडत असला तरी तो एकदिवसीय क्रिकेटमधून निवृत्त होत नाहीये; तो निवडीसाठी उपलब्ध राहील.
आता अफगाणिस्तानचा संघ ऑगस्टमध्ये आयर्लंडविरुद्ध पाच सामन्यांची एकदिवसीय मालिका खेळणार असून, या मालिकेसाठी संघाला नवीन कर्णधार मिळणार आहे.
