आयपीएल २०२१ हंगामातील १६ वा सामना रॉयल चॅलेंजर्स बेंगलोर विरुद्ध राजस्थान रॉयल्स संघात झाला. मुंबईच्या वानखेडे स्टेडियमवर झालेल्या या सामन्यात बेंगलोरने १० गड्यांनी मोठा विजय मिळवला. या सामन्यात प्रथम फलंदाजीसाठी उतरलेल्या राजस्थानने बेंगलोरला १७८ धावांचे आव्हान दिले होते. हे आव्हान बेंगलोरने एकही गडी न गमावता १७ व्या षटकात सहज पार केले. बेंगलोरला विजय मिळवून देणाऱ्या कर्णधार विराट कोहली व देवदत्त पडीक्कल या जोडीच्या नावे एक नवा विक्रम नोंदवला गेला.
विराट पडीक्कलची नाबाद भागीदारी
बेंगलोरच्या गोलंदाजांनी वानखेडे स्टेडियमवरील फलंदाजांना मदतगार असणाऱ्या खेळपट्टीवर राजस्थानला १७७ धावांवर रोखले. या धावांचा पाठलाग करताना कर्णधार विराट कोहली व युवा सलामीवीर देवदत्त पडीक्कलने प्रथम फलंदाजीचा नजराणा सादर करत संघाला १० गड्यांनी मोठा विजय मिळवून दिला. पडीक्कलने ५२ चेंडूत नाबाद १०१ तर, विराटने ४७ चेंडूत नाबाद ७२ धावांची खेळी केली. या नाबाद १८१ धावांच्या भागीदारीसह या जोडीच्या नावे सलामीवीर म्हणून एक विक्रम जमा झाला.
चौथी सर्वात यशस्वी जोडी
राजस्थानविरुद्ध केलेल्या १८१ धावांच्या नाबाद मॅचविनिंग भागीदारीसह विराट-पडीक्कल जोडी आयपीएलमध्ये सर्वाधिक धावांची सलामी देणाऱ्या जोड्यांमध्ये चौथ्या क्रमांकावर आली. आयपीएलच्या इतिहासात सर्वोत मोठ्या सलामी भागीदारीचा विक्रम सनरायझर्स हैदराबादचे सलामीवीर डेव्हिड वॉर्नर व जॉनी बेअरस्टो यांच्या नावे आहे. या दोघांनी २०१९ आयपीएलमध्ये रॉयल चॅलेंजर्स बेंगलोरविरूद्ध १८५ धावांची भागीदारी केली होती.
या यादीमध्ये दुसऱ्या क्रमांकावर केकेआरचे माजी सलामीवीर गौतम गंभीर आणि ख्रिस लिन असून त्यांनी २०१७ आयपीएल हंगामात गुजरात लायन्स विरुद्ध नाबाद १८४ धावा बनविलेल्या. मयंक अग्रवाल व केएल राहुल यांनी २०२० आयपीएलमध्ये राजस्थान रॉयल्स विरूद्ध पंजाब किंग्ससाठी खेळताना १८१ धावांची सलामी दिलेली. २०२० आयपीएलमध्येच शेन वॉटसन आणि फाफ डू प्लेसीस या चेन्नईच्या अनुभवी सलामीवीरांनी पंजाब किंग्स विरुद्ध नाबाद १८१ धावा ठोकल्या होत्या. त्यानंतर आता या यादीत विराट आणि पडीक्कलचा क्रमांक लागतो.
महत्त्वाच्या बातम्या –
पॉवर प्लेमध्ये राजस्थान रॉयल्स टाय टाय फिस्स! बनवला ‘हा’ नकोसा विक्रम
RCB vs RR : पडीक्कलचे शतक आणि विराटचे अर्धशतक; बेंगलोरचा राजस्थानविरुद्ध १० विकेट्सने ‘रॉयल’ विजय
