भारतीय हॉकी संघाचा वाॅल म्हणून ओळख असणारा अनुभवी गोलकीपर पीआर श्रीजेशने पॅरिस ऑलिम्पिक 2024 मध्ये उत्कृष्ट कामगिरी केल्यानंतर राष्ट्रीय संघातून निवृत्ती घेतली आहे. 36 वर्षीय श्रीजेशने आपल्या 18 वर्षांच्या कारकिर्दीत भारतीय हॉकीसाठी 336 आंतरराष्ट्रीय सामने खेळले आहेत. त्याने सलग दोन ऑलिम्पिक स्पर्धेत कांस्यपदक जिंकून संघाचा गौरव केला. आता त्याच्या निवृत्तीनंतर भारतीय संघाच्या गोलपोस्टची जबाबदारी कोण घेणार हा सर्वात मोठा प्रश्न आहे. श्रीजेशची जागा घेऊ शकतील अशा तीन संभाव्य गोलरक्षकांवर या बातमीद्वारे एक नजर टाकूया.
सूरज करकेरा
सूरज करकेरा गेल्या सात वर्षांपासून राष्ट्रीय संघाचा भाग आहे, मात्र त्याने आतापर्यंत केवळ 43 सामने खेळले आहेत. 2017 च्या आशिया कपमध्ये सुवर्णपदक जिंकणाऱ्या संघाचा भाग असलेल्या सूरजने आपले गोलकीपिंग कौशल्य सिद्ध केले आहे. नुकत्याच ओमान येथे झालेल्या हॉकी 5 च्या विश्वचषक स्पर्धेत तो भारतीय संघाचा भाग होता. 2018 च्या राष्ट्रकुल स्पर्धेतही त्याने संघाचे प्रतिनिधित्व केले होते. आता राष्ट्रीय संघात पुनरागमन करून आपले स्थान पक्के करण्याचे सूरजचे ध्येय आहे.
पवन मलिक
पवन मलिक हा भारतीय हॉकीच्या उदयोन्मुख गोलरक्षकांपैकी एक आहे. त्याने गेल्या वर्षी राउरकेला येथे एफआयएच प्रो लीगमध्ये पदार्पण केले आणि त्याच्या पहिल्या डावाने प्रेक्षकांना प्रभावित केले. 2021 मध्ये भुवनेश्वर येथे झालेल्या एफआयएच कनिष्ठ विश्वचषक स्पर्धेतही त्याने भारतीय संघाचे प्रतिनिधित्व केले होते. पवनने हळूहळू आपल्या खेळात सुधारणा केली आहे आणि आता तो राष्ट्रीय संघात आपले स्थान निश्चित करण्यासाठी सज्ज झाला आहे.
कृष्णा पाठक
कृष्णा पाठक हा भारतीय संघाचा सध्याचा सर्वात अनुभवी गोलरक्षकापैकी एक आहे. 2018 मध्ये आंतरराष्ट्रीय क्रिकेटमध्ये पदार्पण करणाऱ्या कृष्णाने आतापर्यंत 125 आंतरराष्ट्रीय सामने खेळले आहेत. दोन आशियाई क्रीडा स्पर्धेत पदके जिंकून त्याने आपली योग्यता सिद्ध केली आहे. श्रीजेशसोबत एफआयएच प्रो लीगमध्ये खेळताना त्याने वेगवेगळ्या क्वार्टरमध्ये गोलकीपिंगची जबाबदारी घेतली आहे. आंतरराष्ट्रीय अनुभवासह, कृष्णाला सध्या भारतीय गोलकीपिंगच्या जबाबदारीसाठी सर्वात मजबूत उमेदवार मानले जात आहे.
हेही वाचा-
गोलंदाजांसाठी काळचं! पाहा कसोटी क्रिकेटमध्ये सर्वाधिक षटकार ठोकणारे घातक फलंदाज
बीसीसीआयचा ग्रीन सिग्नल? आयपीएल 2025 मध्ये धोनी अनकॅप्ड खेळाडू म्हणून खेळणार!
आयपीएल 2025 लिलावापूर्वी पंजाब किंग्जला मोठा धक्का! मालकीण प्रीती झिंटाची हायकोर्टात धाव
