भारतीय संघाने आयसीसी टी20 विश्वचषक 2026 (icc T20 international world cup 2026) च्या सुपर-8 मधील आपल्या दुसऱ्या सामन्यात चेन्नईच्या एम.ए. चिदंबरम स्टेडियमवर झिम्बाब्वेचा 72 धावांनी मोठा पराभव केला. या विजयामुळे टीम इंडियाने सेमीफायनलमधील आपल्या प्रवेशाच्या आशा जिवंत ठेवल्या आहेत.
आता भारताला 1 मार्च रोजी कोलकात्याच्या ईडन गार्डन्सवर आपला शेवटचा आणि निर्णायक सामना खेळायचा आहे. हा सामना म्हणजे एक प्रकारे ‘व्हर्च्युअल क्वार्टर फायनल’ असून, जो संघ आज जिंकेल तो थेट सेमीफायनलमध्ये प्रवेश करेल.
देशांतर्गत मैदानांवर भारतीय संघाचे वर्चस्व नेहमीच राहिले आहे आणि कोलकात्याचे ईडन गार्डन्सही त्याला अपवाद नाही. या मैदानावर आतापर्यंत टीम इंडियाने एकूण 8 टी20 सामने खेळले आहेत ज्यामध्ये संघाने 7 विजय तर 1 पराभव पत्करला आहे. टीम इंडियाला या मैदानावर शेवटचा पराभव 2011 मध्ये इंग्लंडविरुद्ध (6 विकेट्सने) स्वीकारावा लागला होता. त्यानंतर भारत येथे अपराजित आहे.
ईडन गार्डन्सची खेळपट्टी फलंदाजीसाठी पोषक मानली जाते, पण येथे फिरकीपटूंची (Spinners) जादूही पाहायला मिळते. कर्णधार सूर्यकुमार यादवने (Suryakumar Yadav) येथे 5 सामन्यांत 26.75 च्या सरासरीने 107 धावा केल्या आहेत, ज्यात एका अर्धशतकाचा समावेश आहे. तसेच गोलंदाजीत अक्षर पटेलने आपली छाप पाडली असून, त्याने 2 सामन्यांत 6.2 च्या सरासरीने 5 विकेट्स घेतल्या आहेत. आता संपूर्ण देशाचे लक्ष 1 मार्चच्या या महामुकाबल्याकडे लागले आहे.
