भारत आणि ऑस्ट्रेलिया संघादरम्यान नुकत्याच पार पडलेल्या ब्रिस्बेन येथील कसोटी सामन्यात भारतीय संघाने ऐतिहासिक विजय मिळवत बॉर्डर -गावसकर कसोटी मालिका 2-1 ने जिंकली आहे. भारताच्या या विजयाचा नायक ठरला तो यष्टिरक्षक रिषभ पंत. रिषभने सामन्याच्या पाचव्या दिवशी ऑस्ट्रेलियाच्या 328 धावांच्या लक्ष्याचा पाठलाग करताना शानदार नाबाद 89 धावांची आक्रमक खेळी केली. रिषभच्या या खेळीबद्दल संपूर्ण क्रिकेट विश्वाकडून त्याचे कौतुक होत आहे. अशातच भारताचा माजी दिग्गज खेळाडू सुरेश रैनाने रिषभ सोबत ऑस्ट्रेलिया दौऱ्यापूर्वी झालेल्या संभाषणाचा उलगडा केला आहे.
एका मुलाखतीदरम्यान रैना म्हणाला की ऑस्ट्रेलिया दौऱ्यावर जाण्यापूर्वी त्याची व रिषभची भेट झाली होती. त्यावेळी रिषभ रैनाला म्हणाला, ” मला जगातील सर्वोत्तम यष्टिरक्षक फलंदाज बनायचे आहे.”
रिषभ सोबत सरावादरम्यानचा प्रसंग उलगडताना रैना म्हणाला, “त्याच्याबद्दल मीडियात बऱ्याच बाबी बोलल्या जातात. त्यामुळे रिषभला या सर्वांपासून ब्रेक हवा होता. त्याला केवळ ऐकायचे होते. त्याला माझ्याकडून कुठल्याही मदतीची अपेक्षा नव्हती.”
रैना पुढे म्हणाला,” रिषभ हा एक प्रतिभावान युवा खेळाडू असून, माझ्या मते तो आगामी काळात भारतासाठी एक मोठा खेळाडू बनणार आहे. मागील वर्षी जूनमध्ये तो खराब फॉर्ममध्ये असताना येथे आला होता. जेव्हा आमचा सराव नसायचा, तेव्हा तो संपूर्ण दिवस घरीच असायचा. माझ्या मुलांसोबत खेळायचा, माझ्या पत्नी सोबत गप्पा मारायचा. आम्ही नेटफ्लिक्सवर बरेच विनोदी चित्रपट बघितले.”
रिषभच्या फिटनेसबद्दल बोलताना रैना म्हणाला, “रिषभने माझ्यासोबत फिटनेस वर बरेच काम केले. त्याच्या फलंदाजीत काहीही कमी नव्हती, त्याला केवळ एका चांगल्या मनस्थितीत येणे गरजेचे होते.”
रिषभने ब्रिस्बेन कसोटी सामन्यात अविश्वसनीय खेळी केली. सामन्याच्या पाचव्या दिवशी त्याने 138 चेंडूत 9 चौकार व 1 षटकारासह 89 धावांची आक्रमक खेळी केली. रिषभच्या या खेळीमुळेच भारतीय संघाला 328 धावांचे डोंगरा एवढे लक्ष पार करण्यात यश मिळाले. आपल्या आक्रमक खेळीसाठी रिषभला सामनावीराचा पुरस्कार देखील घोषित करण्यात आला.
महत्त्वाच्या बातम्या –
द्रविडचा ‘तो’ इमेल शेअर करत पीटरसनची भारत दौऱ्याआधी इंग्लंडच्या सलामीवीरांना मदत
गॅले कसोटीत तब्बल सहा श्रीलंकन फलंदाजांना अंडरसनने धाडलं तंबूत, मिळवला मोठा किर्तीमान
ऑस्ट्रेलियाविरुद्धच्या ऐतिहासिक विजयानंतर अजिंक्य रहाणेने केले होते भावनिक भाषण, व्हिडिओ व्हायरल