वनडे क्रमवारी: भारताच्या विराट कोहली, रोहित शर्माला मोठे नुकसान, पाहा कोण कितव्या स्थानावर

भारताचे दिग्गज फलंदाज विराट कोहली (Virat Kohli) आणि रोहित शर्मा (Rohit Sharma) यांना वेस्ट इंडीजविरुद्धच्या मर्यादीत षटकांच्या मालिकेपूर्वी मोठा झटका लागला आहे. नुकतेच आयसीसीने एकदिवसीय क्रमवारी जाहीर केली आहे. या क्रमवारीत विराट आणि रोहित यांचे नुकसान झाले आहे. 

आयसीसी एकदिवसीय क्रमवारीत विराटला ८, तर रोहितला १२ गुणांचे नुकसान झाले आहे. पाकिस्तानचा कर्णधार बाबर आजम एकदिवसीय क्रमवारीत पहिल्या क्रमांकावर कायम आहे. काही दिवसांपूर्वी भारताला दक्षिण अफ्रिकेविरुद्धच्या एकदिवसीय मालिकेत ०-३ असा मोठा पराभव मिळाला. या मालिकेत दक्षिण अफ्रिकेच्या क्विंटन डी कॉक आणि रास्सी वॅन डर ड्यूसेन यांनी महत्त्वापूर्ण खेळी केली होती. याच कारणास्तव या दोन फलंदाजांना क्रमवारीत मोठा फायदा झाला आहे.

नवीन एकदिवसीय क्रमवारीनुसार बाबर आजम ८७८ गुणांसह पहिल्या क्रमांकावर कायम आहे. विराटला ८ गुणांचे नुकसान झाले असले, तरी तो दुसऱ्या क्रमांकावर कायम आहे. रोहित शर्माही त्याच्या तिसऱ्या क्रमांकावर कायम आहे. रोहित आणि न्यूझीलंडचा रॉस टेलर यांच्याकडे प्रत्येकी ८०१ गुण आहेत. टेलर चौथ्या क्रमांकावर आहे.

भारताविरुद्ध जबरदस्त एकदिवसीय प्रदर्शन केल्यानंतर रस्सी वॅन डर ड्यूसनने (Rassie van der Dussen) १० स्थानांची मोठी झेप घेतली आहे. आता ड्यूसने १० व्या क्रमांकावर आला आहे आणि त्याने भारताविरुद्ध मालिकेत २१८ धावा केल्या होत्या. त्याचसोबत क्विंटन डी कॉक, ज्याने भारताविरुद्ध एकदिवसीय मालिकेत २२९ धावा केल्या होत्या. तो चार स्थानांच्या फायद्यासह ५ व्या क्रमांकावर पोहोचला आहे.