ऋतुराजला मैदानावर पाहण्यास आतुर चाहत्यांसाठी धक्कादायक बातमी, दुखण्याने बेजार खेळाडू

भारत विरुद्ध श्रीलंका (IND vs SL) यांच्यात गुरुवारी (२४ फेब्रुवारी) टी२० मालिकेतील पहिला सामना (First T20I) झाला. लखनऊच्या भारतरत्न श्री अटल बिहारी वाजपेयी एकाना क्रिकेट स्टेडियमवर हा सामना पार पडला. या सामन्यात भारताच्या प्लेइंग इलेव्हनमध्ये तब्बल ६ बदल पाहायला मिळाले. तसेच भारतीय संघाला अजून एक धक्काही बसला आहे. भारताचा युवा मराठमोळा फलंदाज ऋतुराज गायकवाड (Ruturaj Gaikwad) या सामन्यात अनुपलब्ध होता. दुखापतीमुळे (Ruturaj Gaikwad Injured) तो या सामन्यात खेळू शकला नाही. 

भारताच्या टी२० संघाचा सलामीवीर फलंदाज केएल राहुल हा हॅमस्ट्रिंगच्या दुखापतीमुळे मागील वेस्ट इंडिजविरुद्धच्या टी२० मालिकेला मुकला होता. त्यानंतर तो श्रीलंकेविरुद्धच्या टी२० मालिकेतूनही बाहेर झाला आहे. त्यामुळे त्याच्याजागी ऋतुराजला भारताच्या टी२० संघात जागा देण्यात आली आहे. वेस्ट इंडिजविरुद्ध पूर्णवेळ बाकावर बसून राहिलेल्या ऋतुराजला कमीत कमी श्रीलंकेविरुद्ध तरी खेळण्याची संधी मिळेल, अशी क्रिकेटप्रेमींना वाटत होते.

परंतु लखनऊ येथील पहिल्या टी२० सामन्यासाठी प्लेइंग इलेव्हन जाहीर करताना कर्णधार रोहित शर्मा याने ऋतुराज दुखापतीमुळे या सामन्यात खेळू शकणार नसल्याचे सांगितले आहे. तसेच भारतीय क्रिकेट नियामक मंडळानेही (बीसीसीआय) ट्वीट करत यासंदर्भात अधिकृत माहिती दिली आहे.

“ऋतुराज गायकवाडला त्याच्या उजव्या हाताच्या मनगटात वेदना जाणवत आहेत. यामुळे तो फलंदाजी करण्यास अक्षम आहे. म्हणून तो पहिल्या टी२० सामन्यात खेळू शकणार नाही. भारतीय संघाची मेडिकल टीम त्याच्या दुखापतीवर लक्ष ठेवून आहे,” असे बीसीसीआयने म्हटले आहे.