सूर्या… इतिहास घडवणारा कॅप्टन! ऑस्ट्रेलियाविरुद्ध बनवला आजपर्यंत कुणालाच न जमलेला विक्रम, घ्या जाणून

गुरुवारी (दि. 23 नोव्हेंबर) विशाखापट्टणम येथे पार पडलेल्या 5 सामन्यांच्या टी20 मालिकेतील पहिल्या सामन्यात भारतीय संघाने ऑस्ट्रेलियाला पराभवाची धूळ चारली. भारताने 2 विकेट्सने ऑस्ट्रेलियाचा धुव्वा उडवत टी20 विश्वचषक 2024 स्पर्धेसाठी आपल्या तयारीची सुरुवात केली. भारताने सूर्यकुमार यादव याच्या नेतृत्वाखालील पहिल्याच सामन्यात ऐतिहासिक कामगिरी केली. चला तर, तो काय पराक्रम आहे, जाणून घेऊयात…

भारताचा सूर्याच्या नेतृत्वाखाली विक्रम
भारतीय संघाने (Team India) या सामन्यात नाणेफेक जिंकत गोलंदाजीचा निर्णय घेतला होता. यावेळी ऑस्ट्रेलियाने निर्धारित 20 षटकात 3 विकेट्स गमावत 208 धावा केल्या होत्या. या आव्हानाचा पाठलाग करताना भारताने 19.5 षटकात 8 विकेट्स गमावत 209 धावा केल्या. यासह भारताने खास विक्रम आपल्या नावावर केला.

भारताने सूर्यकुमार यादव (Suryakumar Yadav) याच्या नेतृत्वाखाली 5 सामन्यांच्या टी20 मालिकेतील पहिल्याच सामन्यात इतिहास घडवला. भारताने ऑस्ट्रेलियाविरुद्ध टी20 क्रिकेटमधील सर्वात मोठ्या धावसंख्येचा यशस्वी पाठलाग केला. भारताने यापूर्वी 2019मध्ये वेस्ट इंडिजविरुद्ध 208 धावांचे आव्हान यशस्वीरीत्या पार केले होते. अशात सूर्याने कर्णधारपद आपल्या हातात घेताच जलवा दाखवण्यास सुरुवात केली आहे.

सूर्याची बॅट तळपली
या सामन्यात भारतीय कर्णधार सूर्यकुमार यादव याची बॅट चांगलीच तळपली. सूर्याने कर्णधारपदाला साजेसा खेळ करून दाखवला. त्याने अवघ्या 42 चेंडूत 80 धावांची वादळी खेळी केली. त्याच्या खेळीत 4 षटकार आणि 9 चौकारांचा समावेश होता. सूर्याने भारताकडून कर्णधार म्हणून पदार्पण करताना टी20तील सर्वाधिक धावसंख्या उभारली. यासह त्याने स्पष्ट केले आहे की, त्याला टी20 स्पेशलिस्ट का म्हटले जाते. पुढील वर्षी टी20 विश्वचषक 2024 (T20 World Cup 2024) होणार आहे, अशात हा प्रश्न उपस्थित होत आहे की, विश्वचषकात नेतृत्व कुणाला दिले जाणार? सूर्याने विश्वचषकापूर्वी स्वत:ला सिद्ध केले, तर कदाचित त्याला विश्वचषकात नेतृत्व करण्याची संधी मिळू शकते. (ind vs aus T20I india biggest chase in suryakumar yadav captaincy create history)

हेही वाचा-
रिंकूने अखेरच्या चेंडूवर मारला गगनचुंबी सिक्स, पण खात्यात जोडल्या गेल्या 0 धावा; ICCचा हैराण करणारा नियम
ऑस्ट्रेलियाला पराभूत केल्यानंतर सूर्या ‘या’ 3 भारतीयांवर नाराज; म्हणाला, ‘तुम्हाला एवढंच सांगतो, लय…’
‘या’ भारतीय खेळाडूच्या लग्नाचा उडाला बार, स्वातीच्या प्रेमात झाला क्लीन बोल्ड; वाचा कोण आहे तो