अवघ्या ५ चेंडूत भारताला ३ मोठे धक्के, बांगलादेशी गोलंदाजांच्या करामतीची आयसीसीकडून दखल

भारत आणि बांगलादेश महिला संघांमध्ये मंगळवारी (२२ मार्च) आमना सामना झाला. न्यूझीलंडमध्ये खेळल्या जात असलेल्या महिला एकदिवसीय विश्वचषकाच्या २२ व्या सामन्यात भारताने बांगलादेशला ११० धावांनी पराभूत केले. भारतीय संघाने प्रथम फलंदाजी करताना २२९ धावा केल्या होत्या. यादरम्यान बांगलादेश संघाने भारताच्या फलंदाजीवेळी असे ५ चेंडू टाकले, ज्यामुळे सामन्याचे चित्र पूर्णपणे पालटले आणि भारतीय संघ अपेक्षित धावसंख्येपर्यंत पोहचू शकला नाही.

सलामीवीर स्मृती मंधाना (smriti mandhana) आणि शेफाली वर्मा (shafali verma) यांनी भारताला चांगली सुरुवात दिली. दोघींनी पहिल्या विकेटसाठी ७४ धावांची भागीदारी केली. १४.५ षटकांमध्ये भारताने एकही विकेट न गमावता ७४ धावा केल्या होत्या आणि पुढे १६ व्या षटकाच्या शेवटीपर्यंत संघाची धावसंख्या ३ विकेट्सच्या नुकसानावर ७४ धावा झाली होती. १५ व्या षटकाच्या शेवटच्या चेंडूवर मंधानाच्या रूपात भारताला पहिला झटका लागला. नहिदा अख्तरने टाकलेल्या चेंडूवर मंधाना फरगना हकच्या हातून झेलबाद झाली.

पहिली विकेट गमावल्यानंतरही भारतीय संघाला शेफाली वर्मा खेळपट्टीवर उपस्थित असल्याचे समाधान होते, कारण तोपर्यंत ती खेळपट्टीवर सेट झाली होती. त्यानंतर १६ व्या षटकात रितू मोनी गोलंदाजी करण्यासाठी आली. रितूच्या षटकातील तिसऱ्या चेंडूवर शेफालीने विकेट मगावली आणि भारताला दुसरा झटका लागला. बांगलादेशी यष्टीरक्षकाने शेफालीला यष्टीचीत करून मैदानाबाहेर पाठवले. त्यानंतर कर्णधार मिताली राज (mithali raj) पहिल्याच चेंडूवर झेलबाद झाली. फातिमा खातूनने मितालीचा सोपा झेल घेतला. अशा प्रकारे बांगलादेशने अवघ्या ५ चेंडूत भारतीय संघाच्या अतिशय महत्वाच्या तीन विकेट्स घेतल्या होत्या.

https://www.instagram.com/reel/CbY4m_elwAI/?utm_source=ig_web_copy_link