भारतीय वेगवान गोलंदाज गुरनूर बराड याला आयसीसीच्या (ICC) आचारसंहितेचे उल्लंघन केल्याबद्दल शिक्षा झाली आहे. आयसीसीने अधिकृत पत्रक प्रसिद्ध करून माहिती दिली की, गुरनूरने आचारसंहितेच्या कलम २.९ चे उल्लंघन केले आहे, ज्यासाठी त्याला एक डिमेरिट पॉईंट (Demerit Point) देण्यात आला आहे. हे कलम इतर कोणत्याही खेळाडूच्या दिशेने धोकादायक पद्धतीने चेंडू फेकण्याशी संबंधित आहे.
हे प्रकरण बर्मिंगहॅम येथे खेळल्या गेलेल्या पहिल्या वनडे सामन्यातील आहे. त्या सामन्यात इंग्लंडचा संघ प्रथम फलंदाजी करत होता आणि डावाच्या आठव्या षटकात गुरनूर बराड गोलंदाजीसाठी आला, तर समोर बेन डकेट फलंदाजी करत होता. षटकाच्या पाचव्या चेंडूवर डकेटने समोरच्या दिशेने शॉट खेळला आणि चेंडू थेट गुरनूरकडे गेला. त्यानंतर भारतीय गोलंदाजाने धोकादायक पद्धतीने चेंडू डकेटच्या दिशेने फेकला. गुरनूर बराडच्या या कृत्याला मॅच रेफरीने अयोग्य आणि धोकादायक श्रेणीत ठेवले.
विशेष म्हणजे, लेव्हल १ च्या गुन्ह्यासाठी एखाद्या खेळाडूला ताकीद दिली जाऊ शकते किंवा त्याच्यावर मॅच फीच्या ५० टक्क्यांपर्यंत दंड ठोठावला जाऊ शकतो आणि एक किंवा दोन डिमेरिट पॉईंट्स दिले जाऊ शकतात. जर एखाद्या खेळाडूला २४ महिन्यांच्या कालावधीत ४ किंवा त्यापेक्षा जास्त डिमेरिट पॉईंट्स मिळाले, तर त्याचे निलंबन पॉईंट्समध्ये (Suspension Points) रूपांतर होते. २ निलंबन पॉईंट्सचा अर्थ असा की खेळाडूवर एक कसोटी, २ वनडे किंवा २ टी-२० सामन्यांची बंदी घातली जाऊ शकते.
गुरनूर बराडने पहिल्या वनडे सामन्यात उत्कृष्ट गोलंदाजी केली होती. त्याने आपल्या स्पेलच्या पहिल्या २ षटकात २९ धावा दिल्या होत्या, पण त्यानंतर त्याने बेन डकेट आणि जेकब बेथेल यांना एकाच षटकात बाद केले. गुरनूरने या सामन्यात ९ षटकात ६१ धावा देत २ बळी घेतले होते.
