मुंबई । आयपीएलच्या 13 व्या हंगामात मुंबई इंडियन्सने आपला पहिला विजय मिळविला. चेन्नई सुपर किंग्सविरुद्धच्या पराभवातून सावरल्यानंतर मुंबईने बुधवारी कोलकाता नाईट रायडर्सवर मात केली. अबूधाबीच्या शेख झायेद स्टेडियमवर झालेल्या सामन्यात मुंबईने केकेआरचा 49 धावांच्या फरकाने पराभव केला. रोहितच्या नेतृत्वात मुंबई संघाने कार्तिकच्या केकेआरवर प्रत्येक क्षेत्रात वर्चस्व राखले.
मुंबईच्या या विजयात काही खेळाडूंचे महत्त्वाचे योगदान राहिले. अशाच ६ खेळाडूंच्या कामगिरीवर एक नजर टाकूया.
रोहित शर्मा:
केकेआरविरुद्ध आपला शानदार फॉर्म कायम ठेवत रोहितने कर्णधारपदाला साजेशी अशी खेळी केली. रोहितच्या बॅटमधून पुन्हा एकदा धावांचा पाऊस पडला. त्याने फक्त 54 चेंडूत 80 धावा केल्या. या दरम्यान रोहितने तीन चौकार आणि सहा षटकार लगावले. त्याने सूर्यकुमार यादवबरोबर दुसर्‍या विकेटसाठी 90 धावांची महत्त्वपूर्ण भागीदारीही रचली. तसेच त्याने मैदानात संघाचे नेतृत्व करताना चांगले निर्णय घेतले. त्याने आपल्या गोलंदाजांचा चांगला उपयोग करुन घेतला.
सूर्यकुमार यादवः
पहिल्या सामन्यात अपयशी ठरल्यानंतर सूर्यकुमार यादवची बॅट दुसऱ्या सामन्यात चालली. त्याने तिसर्‍या क्रमांकावर फलंदाजी करत अवघ्या 28 चेंडूत 47 धावा फटकावल्या. या दरम्यान त्याने सहा चौकार आणि एक षटकारही लगावला. धावबाद होण्यापूर्वी यादवने रोहितबरोबर महत्त्वपूर्ण भागीदारी रचली.
जसप्रीत बुमराहः
वेगवान गोलंदाज जसप्रीत बुमराह त्याच्या जुन्या रंगात दिसत होता. त्याने आपल्या सटीक आणि धोकादायक गोलंदाजीने कोलकाताच्या मधल्या फळीला खिंडार पाडले. बुमराहने त्याच्या षटकात धोकादायक आंद्रे रसेलला प्रथम माघारी धाडले आणि त्यानंतर ओएन मॉर्गनला तीन चेंडूनंतर पॅव्हेलियनमध्ये पाठवले. बुमराहच्या या षटकाने सामन्याचा नूर पूर्णपणे पलटला. त्याने चार षटकांत 32 धावा देऊन दोन बळी घेतले.
कायरन पोलार्ड:
अष्टपैलू कायरन पोलार्डने सुरुवातीपासून तीन्ही क्षेत्रांमध्ये महत्त्वपूर्ण भूमिका बजावली. त्याने सात चेंडूंमध्ये 13 धावा केल्या आणि नाबाद राहिला. त्यानंतर पोलार्डने तीन षटकांत 21 धावा देऊन एक गडी बाद केला. तसेच शुबमन गिलचा महत्त्वपूर्ण झेल घेतला.
ट्रेंट बोल्ट आणि जेम्स पॅटिन्सन
या चौघांशिवाय ट्रेंट बोल्ट आणि जेम्स पॅटिन्सन यांनीही शानदार गोलंदाजी केली. बोल्ट आणि पॅटिन्सन या दोघांनीही प्रत्येकी दोन गडी बाद केले.
