‘सूर्या’ची बॅटिंग पाहून शास्त्रींना आठवला थेट एबी डिविलियर्स; गोडवे गात म्हणाले, ‘असे खेळाडू…’

शनिवारी (९ एप्रिल) आयपीएल २०२२च्या १८व्या सामन्यात मुंबई इंडियन्सला रॉयल चॅलेंजर्स बेंगलोरने ७ विकेट्स राखून धूळ चारली. मुंबई इंडियन्सचा मध्यक्रमातील फलंदाज सूर्यकुमार यादवने या सामन्यात जबरदस्त फलंदाजी केली, पण संघाला विजय मिळवून देऊ शकला नाही. आता याच पार्श्वभूमीवर भारतीय संघाचे माजी प्रशिक्षक आणि दिग्गज खेळाडू रवी शास्त्रींनी सूर्यकुमारचे कौतुक केले आहे. शास्त्रींच्या मते सूर्यकुमारला त्याच्या कामगिरीसाठी ‘सूर्य नमस्कार’ केला पाहिजे.

आयपीएल २०२२च्या सुरुवातीच्या दोन सामन्यांमध्ये सूर्यकुमार यादव (Suryakumar Yadav) मुंबई इंडियन्सच्या ताफ्यात सहभागी नव्हता. यादरम्यानच्या काळात तो दुखापतग्रस्त होता, पण त्यानंतर मागच्या दोन सामन्यात त्याने अर्धशतके ठोकत जोरदार पुनरागमन केले आहे. चालू हंगामातील पहिला सामना त्याने कोलकाता नाईट रायडर्ससोबत खेळला होता आणि यामध्ये ५२ धावांची महत्वाची खेळी केली होती. त्यानंतर आता दुसऱ्या सामन्यात आरसीबीविरुद्ध त्याने ३७ चेंडूत ५ चौकार आणि ६ षटकारांसह नाबाद ६८ धावा केल्या. सूर्यकुमारच्या या खेळीमुळे मुंबई इंडियन्सला सन्मानजनक धावसंख्या गाठता आली.

रवी शास्त्री (Ravi Shastri) सूर्यकुमारचे कौतुक करताना म्हणाले की, “अविश्वसनीय. त्याने शेवटच्या सामन्यात एक सोनेरी खेळी केली होती आणि आजचा दिवस (शनिवारी) खरोखर खास होता. जेव्हा तुमच्या ५० धावांवर ० विकेट्स असतील, नंतर तुम्ही ८९ धावांवर ६ विकेट्स गमावता आणि अशा परिस्थितीत तुमचा संघ शेवटच्या ५ षटकांमध्ये ७१ धावा करतो, ज्यामध्ये सूर्यकुमारचे योगदान सर्वात मोठे आहे, तर तुम्हाला माहिती पाहिजे की, शेवटी जेव्हा तो जात असेल, तेव्हा त्याला सूर्य नमस्कार केला पाहिजे.”