चिंतामणी चषक राज्यस्तरीय कबड्डी स्पर्धेच्या तिसऱ्यादिवशी साखळी सामने संपन्न झाले. ७ गटाच्या साखळीसामन्यानंतर १४ संघानी बादफेरीत प्रवेश निश्चित केला. जय भारत मुंबई शहर व अंकुर स्पोर्ट्स मुंबई शहर हे दोन संघ थेट उपांत्यपूर्व फेरीसाठी पात्र ठरले. उर्वरीत १२ संघाना उपउपांत्यपूर्व फेरीचे सामने खेळावे लागणार आहेत.
ब गटात रेल्वे पोलीस बॉईज विरुद्ध आई अष्टभुजा मंडळ पालघर संघात झालेल्या लढतीत आई अष्टभुजा संघाने ३७-३१ असा विजय मिळवत बादफेरीत प्रवेश निश्चित केला. रोशन वैती, हार्दिक मेहेर यांनी उत्कृष्ट खेळ करत विजयात महत्वाची भूमिका बजावली. रेल्वे बॉईज गटात दोन्ही सामने हरल्याने त्याचे आव्हान संपुष्टात आले. ब गटातील शेवटच्या सामन्यांत अंकुर स्पोर्टसने आई अष्टभुजा संघावर ३७-२० असा विजय मिळवत थेट उपांत्यपूर्व फेरीत प्रवेश मिळवला.
ग गटातील गोल्फादेवी सेवा विरुद्ध शिवशक्ती या महत्वपूर्ण लढतीत शिवशक्ती संघाने २५-२४ अशी बाजी मारत बादफेरीत धडक दिली. विराज सोनी, ओमकार देशमुख, संतोष वारकरी यांनी चांगला खेळ केला. तर गोल्फादेवी कडून सिद्धेश पिंगळे, लक्ष्मण दोलवडे बरे खेळले. ग गटातील हा शेवटच्या सामना होता. ग गटातील तिन्ही संघाचे साखळी गुण प्रत्येकी २ अस समसमान होते. त्यामुळे गुणांच्या सरासरीवर गोल्फादेवी व शिवशक्ती संघानी बादफेरीत प्रवेश केला. तर अ गटात जय भारत संघाने जॉली क्रीडा मंडळावर २६-२५ असा विजय मिळवत थेट उपांत्यपूर्व फेरीत धडक मारली.
इ गटातील बंड्या मारुती विरुद्ध विजय नवनाथ यामहत्वपूर्ण लढतीत ३५-२६ असा बंड्या मारुती संघाने विजय मिळवत बादफेरीत प्रवेश केला. बंड्या मारुती कडून निलेश लाड, जितेश सातपे, सागर पाटील व आकाश चव्हाण चांगले खेळले. या गटातही सर्व साखळी सामन्यानंतर तिन्ही संघाचे गुण समान झाले होते. त्यामुळे सरासरीच्या निकषावर केदारनाथ व बंड्या मारुती संघानी बादफेरीत प्रवेश मिळवला. क गटात विजय बजरंग व्यायाम मंडळाने ३८-२८ असा सत्यम उपनगर संघावर विजय मिळवत बादफेरीत प्रवेश निश्चित केला.
तिसऱ्या दिवशी झालेल्या दोन उपांत्यपूर्व फेरीच्या सामन्यांत केदारनाथ मंडळ उपनगर संघाने २२-२१ असा महाराष्ट्र कबड्डी संघ राहटणी पुणे संघाचा पराभव केला. तर विजय बजरंग व्या मंडळाने २८-२६ असे अमर क्रीडा मंडळाला नमवत उपांत्यपूर्व फेरीत धडक दिली.