दिल्लीत अफगाणिस्तानविरुद्ध झालेल्या दुसऱ्या टी20 सामन्यात भारतीय वेगवान गोलंदाज जसप्रीत बुमराहने उत्कृष्ट गोलंदाजी करत एक महत्त्वपूर्ण टप्पा गाठला. पूर्ण सदस्य (Full Member) देशांच्या टी-20 आंतरराष्ट्रीय क्रिकेटमध्ये सर्वाधिक मेडन ओव्हर्स टाकणारा गोलंदाज म्हणून त्याने विक्रम प्रस्थापित केला.
या सामन्यात बुमराहने आपल्या चार षटकांच्या स्पेलमध्ये केवळ 25 धावा दिल्या आणि एक विकेट घेतला. सामन्याच्या अगदी सुरुवातीलाच त्याने एक मेडन ओव्हर टाकली. त्याच्या टी-20 आंतरराष्ट्रीय कारकिर्दीतील ही 13वी मेडन ओव्हर ठरली.
विशेष म्हणजे, भारतीय संघासाठी टी-20 सामन्यात डावाचे पहिलेच षटक मेडन टाकण्याची बुमराहची ही पहिलीच वेळ होती. याआधीच्या सामन्यात त्याने टी-20 क्रिकेटमध्ये 350 बळी पूर्ण करण्याचा महत्त्वपूर्ण टप्पा गाठला होता.
आपल्या 97व्या टी-20 आंतरराष्ट्रीय सामन्यात बुमराहने झिम्बाब्वेच्या रिचर्ड न्गारावाचा विक्रम मागे टाकला. न्गारावाच्या नावावर टी-20 आंतरराष्ट्रीय क्रिकेटमध्ये 12 मेडन ओव्हर्सचा विक्रम आहे. या यादीत भारताचा भुवनेश्वर कुमार 10 मेडन ओव्हर्ससह तिसऱ्या स्थानावर आहे.
सर्व देशांचा विचार करता, युगांडाचा फ्रँक न्सुबुगा आणि रवांडाचा मोहम्मद नादिर यांच्या नावावर प्रत्येकी 19 मेडन ओव्हर्सचा विक्रम आहे. त्यानंतर केनियाच्या शेम न्गोचेचा क्रमांक लागतो, ज्याच्या नावावर १६ मेडन ओव्हर्स आहेत.
टी-20 आंतरराष्ट्रीय सामन्यांमध्ये सर्वाधिक मेडन ओव्हर्स (पूर्ण सदस्य देश)
13– जसप्रीत बुमराह (भारत)
12 – रिचर्ड न्गारावा (झिम्बाब्वे)
10 – भुवनेश्वर कुमार (भारत)
9– ब्लेसिंग मुझाराबानी (झिम्बाब्वे)
8 – मुस्तफिजुर रहमान (बांगलादेश)
भारत आणि अफगाणिस्तान यांच्यातील दुसऱ्या टी-20 सामन्यात भारताने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करताना अफगाणिस्तानने 20 षटकांत 8 गडी गमावून 159 धावा केल्या. परिणामी, विजयासाठी भारतासमोर 160 धावांचे लक्ष्य ठेवण्यात आले. अफगाणिस्तानकडून इब्राहिम झद्रानने सर्वाधिक ३७ धावा केल्या. भारतासाठी नितीश कुमार रेड्डी यांनी सर्वाधिक, म्हणजेच तीन बळी घेतले.
लक्ष्याचा पाठलाग करताना भारताने सामना 14.5 षटकात 7 विकेट्सने जिंकला. ज्यामध्ये संजू सॅमसनने 57, अभिषेक शर्मा 39 आणि इशान किशनने 38 धावांचे योगदान दिले.
