वेस्ट इंडिजचा डॅशिंग ऑलराउंडर कायरन पोलार्डने टी-20क्रिकेटमध्ये मोठी कामगिरी केली आहे. या फॉरमॅटमध्ये सर्वाधिक धावा काढण्याच्या बाबतीत तो दुसऱ्या क्रमांकावर पोहोचला आहे. या मध्ये त्याने इंग्लंडचा डॅशिंग फलंदाज अॅलेक्स हेल्सला मागे टाकले आहे. मेजर लीग क्रिकेट (एमएलसी) 2025 मध्ये टेक्सास सुपर किंग्जविरुद्धच्या सामन्यात पोलार्डने ही कामगिरी केली. या स्पर्धेत पोलार्ड एमआय न्यू यॉर्ककडून खेळत आहे. टी-20 क्रिकेटमध्ये सर्वाधिक धावा करणाऱ्या फलंदाजांच्या यादीत पोलार्ड आता फक्त ख्रिस गेलच्या मागे आहे.
टी-20 क्रिकेटमध्ये सर्वाधिक धावा करणाऱ्या फलंदाजांबद्दल बोलायचे झाले तर ख्रिस गेलचे नाव अव्वल स्थानावर आहे. गेलने 463 सामन्यांमध्ये 14562 धावा केल्या आहेत. आता कायरन पोलार्ड दुसऱ्या क्रमांकावर पोहोचला आहे. त्याने 702 सामन्यांमध्ये 13738 धावा केल्या आहेत. इंग्लंडचा अॅलेक्स हेल्सचे नाव तिसऱ्या क्रमांकावर आहे. हेल्सने 501 सामन्यांमध्ये 13735धावा केल्या आहेत. पाकिस्तानचा शोएब मलिकने 557 सामन्यांमध्ये 13571 धावा केल्या आहेत आणि तो या यादीत चौथ्या क्रमांकावर आहे. भारताचा दिग्गज फलंदाज विराट कोहली पाचव्या क्रमांकावर आहे. त्याने टी20 क्रिकेटमध्ये 13543 धावा केल्या आहेत.
टी20 क्रिकेटमध्ये सर्वाधिक धावा करणारे फलंदाज
14562- ख्रिस गेल (463 सामने)
13738- कायरन पोलार्ड (702 सामने)
13735- अॅलेक्स हेल्स (501 सामने)
13571 – शोएब मलिक (557 सामने)
13543 – विराट कोहली (414 सामने)
एमएलसीच्या चालू हंगामात पोलार्डच्या कामगिरीबद्दल बोलायचे झाले तर, त्याने 7 सामन्यांमध्ये 40.20 च्या सरासरीने 201 धावा केल्या आहेत. यादरम्यान त्याचा स्ट्राईक रेट 186.11 राहिला आहे. टेक्सास सुपर किंग्जविरुद्धच्या सामन्यात त्याने 39 चेंडूत 70 धावा केल्या. यादरम्यान त्याने 5 चौकार आणि 5 षटकार मारले. टी-20 क्रिकेटमधील त्याच्या आकडेवारीबद्दल बोलायचे झाले तर, त्याने 702 सामन्यांमध्ये 31.43 च्या सरासरीने 13738 धावा केल्या आहेत. पोलार्डच्या नावावर या फॉरमॅटमध्ये एक शतक आणि 62 अर्धशतके आहेत.
