आयपीएल २०२०मध्ये पहिला सामना चेन्नई सुपर किंग्जने मुंबई इंडियन्सविरुद्ध जिंकत स्पर्धेचे अभियान विजयाने सुरु केले. स्पर्धेतील दुसरा सामना दिल्ली डेअरडेविल्स विरुद्ध किंग्ज ११ पंजाब संघात होत आहे.
या महत्त्वाच्या सामन्यात दिल्ली डेअरडेविल्स संघाचे नेतृत्त्व श्रेयस अय्यर करत आहे तर किंग्ज ११ पंजाबचे नेतृत्त्व केएल राहुल करत आहे. केएल राहुल हा पंजाबचे नेतृत्त्व करणारा १२वा खेळाडू ठरला आहे. आयपीएलमध्ये केवळ पंजाब संघाचेच १२ कर्णधार झाले आहेत. त्याखालोखाल दिल्लीचे ११ तर मुंबईचे ७ कर्णधार झाले आहेत.
आजपर्यंत आयपीएलमध्ये केएल राहुलसह ५० खेळाडूंनी एकदातरी संघाचे नेतृत्त्व केले आहे. केएल राहुल हा आयपीएलमध्ये नेतृत्त्व करणारा २४वा भारतीय कर्णधार ठरला आहे. तर तब्बल २६ परदेशी खेळाडूंनी आयपीएलमध्ये कर्णधारपद भुषविले आहे.
सर्वात कमी अर्थात केवळ दोन कर्णधार चेन्नई सुपर किंग्ज, कोची टस्कर केरला व गुजरात लायन्स या संघाचे झाले आहेत. यातील चेन्नई संघाने तब्बल १२ हंगामात भाग घेऊनही केवळ २ कर्णधार पाहिले आहे. एमएस धोनी व त्याच्या अनुपस्थितीत काही सामन्यात रैनाने नेतृत्त्व केले आहे.
गमतीचा भाग म्हणजे तब्बल १२ हंगाम खेळलेल्या कोलकाता नाईट रायडर्सने कर्णधारांवर सर्वाधिक विश्वास दाखवलेला दिसतो. या संघाचे १२ हंगामात केवळ ४ कर्णधार झाले आहेत तर पुणे वॉरियर्स इंडिया संघाचे केवळ ३ हंगामात तब्बल ६ कर्णधार झाले होते. एवढंच नाही तर पुण्याचाच दुसरा संघ रायझिंग पुणे सुपरजायंट्स संघाचेही केवळ दोन हंगामात ३० सामन्यात ३ कर्णधार झाले.
पुणे वॉरियर्स इंडिया संघाचे २०११ ते २०१३ या काळात सौरव गांगुली, युवराज सिंग, ऍरॉन फिंच, ऍंजेलो मेथ्थूज, स्टिवन स्मिथ व रॉस टेलर असे ६ कर्णधार झाले होते तर दुसऱ्या बाजूला रायझिंग पुणे सुपरजायंट्स संघाचे २०१६ व २०१७ अशा दोन हंगामात अजिंक्य रहाणे, एमएस धोनी व स्टिवन स्मिथ असे तीन कर्णधार झाले.