वेस्ट इंडीजविरुद्धची टी-२० सीरीजही नाही खेळणार केएल राहुल? रोहितसोबत ‘हे’ फलंदाज करतील ओपनिंग

भारताचा सलामीवीर फलंदाज केएल राहुल सध्या संघातून बाहेर आहे. वेस्ट इंडीजविरुद्धच्या टी-२० मालिकेत राहुल संघात पुनरागमन करेल, अशी अपेक्षा होती. पंरतु वेस्ट इंडीजविरुद्धच्या एकदिवसीय मालिकेनंतर आता राहुल टी-२० मालिकेतून देखील माघार घेत असल्याचे समोर येत आहे. 

केएल राहुल (KL Rahul) २१ जुलै रोजी कोरोना पॉजिटिव्ह आढळला होता. यानंतर संघात त्याच्या पुनरागमनाविषयी वेगवेगळ्या चर्चा रंगल्या होत्या. २२ जुलैपासून सुरू झालेल्या वेस्ट इंडीजविरुद्धच्या एकदिवसीय मालिकेत खेळला नाही. आता अशा बातम्या समोर येत आहेत की, वेस्ट इंडीजविरुद्धच्या टी-२० मालिकेत देखील राहुल खेळू शकणार नाही. मात्र, बीसीसीआयकडून अद्याप याविषयी कसलीही अधिकृत माहिती दिली गेली नाहीये.

बीसीसीआयच्या एका सूत्राच्या हवाल्यानंतर माध्यमांमध्ये माहिती दिली जात आहे की, “केएल राहुलला कोरोनातून सावरण्यासाठी अजून काही काळाची गरज आहे.” राहुलच्या अनुपस्थितीत रोहित शर्माच्या साथीने रिषभ पंत किंवा इशान किशन डावाची सुरुवात करू शकतात.  उभय संघातील टी-२० मालिकेची सुरुवात २९ जुलै रोजी होईल.

माध्यमांतील वृत्तानुसार आज म्हणजेच बुधवारी (२७ जुलै) त्याच्या विलगिकरण कालावधीचा शेवटचा दिवस होता. परंतु बीसीसीआयच्या मेडिकल टीमने राहुलला अजून एक आठवडला विश्रांती गरजेची असल्याचे सांगितले आहे. दरम्यान काही दिवसांपूर्वी राहुल गंभीर दुखापतीला तोंड देऊन परतला आहे. त्याच्या दुखापतीवर जर्मनीत शस्त्रक्रिया केली गेली असून सध्या तो राष्ट्रीय क्रिकेट अकादमीत रिहॅब करत आहे. परंतु वेस्ट इंडीविरुद्धच्या टी-२० मालिकेपूर्वी आलेल्या या बातमीमुळे त्याच्या पुनरागमनासाठी चाहत्यांची प्रतिक्षा लांबणार असल्याचे दिसते.