आयपीएल २०२६ मध्ये ५७ वा सामना रॉयल चॅलेंजर्स बंगळुरू आणि कोलकाता नाईट रायडर्स यांच्यात खेळला गेला. बुधवारी (१३ मे) रायपूरमध्ये खेळल्या गेलेल्या या सामन्यात आरसीबीच्या स्टार फलंदाजाने शतकी खेळी करत संघाला विजय मिळवून दिला. विराट कोहलीने ६० चेंडूंत ११ चौकार आणि तीन षटकारांच्या सहाय्याने नाबाद १०५ धावा केल्या. आरसीबीने १९.१ षटकांतच १९३ धावांचे लक्ष्य पूर्ण केले आणि हा सामना ६ विकेट्सने जिंकला. विराट या सामन्याचा ‘प्लेयर ऑफ द मॅच’ अर्थातच ‘सामनावीर’ ठरला. त्याचा हा आयपीएलमधील २१ वा सामनावीर पुरस्कार ठरला.
विराटने आयपीएलमध्ये २७९ सामने खेळले आहेत, जे बाकी खेळाडूंच्या तुलनेत सर्वाधिक आहेत. त्याने सामनावीर पुरस्कार जिंकताच मुंबई इंडियन्सचा फलंदाज रोहित शर्मा याची बरोबरी करत आयपीएलमध्ये सर्वाधिक सामनावीर पुरस्कार जिंकणाऱ्या यादीत संयुक्त तिसरे स्थान पटकावले आहे. रोहितने आतापर्यंत २७८ सामन्यांमध्ये खेळताना २१ पुरस्कार जिंकले आहेत.
आयपीएलमध्ये सर्वाधिक सामनावीर पुरस्कार जिंकण्याचा विक्रम एबी डिविलियर्सच्या नावावर आहे. त्याने १८४ सामन्यांमध्ये २५ पुरस्कार जिंकले आहेत. दक्षिण आफ्रिकेचा माजी महान फलंदाज डिविलियर्सने त्याचा शेवटचा आयपीएल हंगाम २०२१ मध्ये खेळला होता. या यादीत दुसऱ्या स्थानी क्रिस गेल असून त्याने १४२ सामने खेळले आणि २२ पुरस्कार जिंकले आहेत.
आयपीएलच्या इतिहासात सर्वाधिक ‘सामनावीर’ पुरस्कार –
एबी डी विलियर्स – २५
क्रिस गेल – २२
विराट कोहली – २१*
रोहित शर्मा – २१
एमएस धोनी – १८
डेव्हिड वॉर्नर – १८
केएल राहुल – १७
रवींद्र जडेजा – १७
सुनील नरेन – १७
सामन्याची स्थिती पाहिली तर आरसीबीचा कर्णधार रजत पाटीदारने नाणेफेक जिंकत प्रथम गोलंदाजी करण्याचा निर्णय घेतला होता. केकेआरने अंगकृष रघुवंशीच्या ७१ धावा आणि रिंकू सिंगच्या नाबाद ४९ धावांच्या जोरावर २० षटकांत ४ विकेट्स गमावत १९२ धावा केल्या होत्या. लक्ष्याचा पाठलाग करताना आरसीबीने आक्रमक सुरूवात केली. पहिली विकेट पडल्यानंतर आलेल्या देवदत्त पडीक्कलने विराटला चांगली साथ दिली. दोघांनी दुसऱ्या विकेटसाठी ९२ धावांची भागीदारी केली. हा सामना आरसीबीने ५ चेंडू शिल्लक राखत जिंकला आणि ते गुणतालिकेत पहिल्या स्थानी आले.
