मुंबई इंडियन्सचा कर्णधार रोहित शर्माच्या होतील ५ कोरोना टेस्ट, काय आहे कारण?

१९ सप्टेंबर ते १० नोव्हेंबर दरम्यान संयुक्त अरब अमिराती अर्थात युएईमध्ये आयपीएल २०२० खेळले जाणार आहे. ४ महिन्यांच्या लॉकडाऊनमुळे त्रस्त झालेले खेळाडू आयपीएलमध्ये खेळण्यासाठी खूप उत्सुक आहेत. आयपीएलमधील सर्वात यशस्वी संघ म्हणजे  मुंबई इंडियन्स. या संघातील देशांतर्गत खेळाडूंनी तर आपला मोर्चा मुंबईकडे वळवला आहे. मुंबईमध्ये पोहोचलेल्या खेळाडूंना फ्रंचायझीकडून १४ दिवसांसाठी क्वारंटाईन करण्यात येणार आहे.

क्वारंटाईनमध्ये असलेले खेळाडू फक्त कोरोना चाचणीच्या वेळी बाहेर येऊ शकतात. इतर वेळी त्यांना त्यांच्या खोलीतच रहावे लागले. त्यांना त्यांच्या खोलीत सर्व सोई-सुविधा उपलब्ध करून देण्यात येतील.

मुंबई इंडियन्सच्या एका अधिकाऱ्याने आयएएनएसला बोलताना म्हटले की, “देशांतर्गत खेळाडूंप्रमाणेच भारतीय संघातील खेळाडूंनीही लवकरात लवकर मुंबईसाठी मागर्स्थ व्हायला पाहिजे. जेणेकरुन देशांतर्गत खेळाडूंप्रमाणे त्यांनाही १४ दिवसांची क्वारंटाईन प्रक्रिया लवकरात लवकर संपवता येईल आणि मैदानावर सराव करण्यासाठी वेळ मिळेल.”

रोहित शर्माच्या नेतृत्त्वाखालील मुंबई इंडियन्स संघाची एक किंवा दोन वेळा नाही तर, तब्बल पाच वेळा कोरोना चाचणी करण्यात येणार आहे. त्यानंतरच मुंबई इंडियन्स हा संघ युएईला रवाना होईल. “संघातील सर्व खेळाडूंना आणि इतर सहकारी कर्मचाऱ्यांना मुंबईला येण्यापुर्वी घरीच २ वेळा त्यांची कोरोना चाचणी करावी लागेल. त्यानंतर मुंबईमध्ये पोहोचल्यानंतर क्वारंटाईनमध्ये असताना फ्रंचायझीकडून त्यांच्या ३ कोरोना चाचणी केल्या जातील. अशाप्रकारे खेळाडूंच्या ५ कोरोना चाचणी घेतल्या जातील,” असे पुढे बोलताना मुंबई इंडियन्सचे अधिकारी म्हणाले. Mumbai Indian Players Will Undergo 5 Corona Test

४ वेळा आयपीएल ट्रॉफी जिंकणारा मुंबई इंडियन्स २१ ऑगस्ट किंवा २२ ऑगस्ट रोजी युएईला जाण्यासाठी रवाना होऊ शकतो. त्यांना ऑगस्टच्या तिसऱ्या आठवड्यात युएईला जायचे होते. पण, आयपीएल गवर्निंग काउंसिलने बैठकीत स्पष्ट केले आहे की, आयपीएलमधील कोणताही संघ २० ऑगस्टनंतर युएईला जाऊ शकतो. त्यामुळे मुंबई इंडियन्सने त्यांच्या निर्णयात बदल केला आहे.

मुंबई इंडियन्स हा आयपीएलमध्ये सर्वाधिकवेळा विजेतेपद मिळवणारा संघ आहे. त्यांनी २०१३ला पहिल्यांदा आयपीएल ट्रॉफी जिंकली होती. त्यावेळी रोहित शर्मा हा पहिल्यांदा संघाचा कर्णधार बनला होता. त्यानंतर रोहितच्या नेतृत्त्वाखाली संघाने २०१५, २०१७ आणि २०१९ या आयपीएल हंगामात विजेतेपद पटकावले.