तीन सामन्यांच्या एकदिवसीय मालिकेत मोठा पराभव पत्करल्यानंतर भारतीय संघ आणि न्यूझीलंड यांच्यात टी20 आंतरराष्ट्रीय मालिकेला सुरुवात झाली आहे. नागपूरच्या व्हीसीए स्टेडियमवर खेळल्या जाणाऱ्या पहिल्या टी20 सामन्यात न्यूझीलंडने नाणेफेक जिंकून प्रथम गोलंदाजी करण्याचा निर्णय घेतला आहे. वनडे मालिकेतील आत्मविश्वास घेऊन मैदानात उतरलेल्या किवी संघाने आपल्या प्लेइंग इलेव्हनमध्ये वेगवान गोलंदाजांवर भर दिला आहे.
या सामन्यात न्यूझीलंडकडून तीन प्रमुख वेगवान गोलंदाजांना संधी देण्यात आली आहे. क्रिश्चियन क्लार्क आज आपला पहिला टी20 आंतरराष्ट्रीय सामना खेळत असून, त्याच्यासाठी हा क्षण विशेष ठरणार आहे. त्याच्यासोबत काइल जॅमीसन आणि जेकब डफी हे दोघेही अंतिम संघात आहेत. फिरकीची जबाबदारी अनुभवी इश सोढी सांभाळणार असून, कर्णधार मिचेल सॅन्टनरकडूनही गोलंदाजीत योगदान अपेक्षित आहे.
दुसरीकडे, भारतीय संघात काही महत्त्वाचे बदल पाहायला मिळत आहेत. श्रेयस अय्यर, हर्षित राणा, रवि बिश्नोई आणि कुलदीप यादव या चौघांना पहिल्या टी20 सामन्यासाठी विश्रांती देण्यात आली आहे. त्यांच्या अनुपस्थितीत भारतीय संघ नव्या संयोजनासह मैदानात उतरला आहे. कर्णधार सूर्यकुमार यादववर संघाचं नेतृत्व करताना फलंदाजीची मोठी जबाबदारी असणार आहे.
भारतीय संघाच्या फलंदाजीची सुरुवात अभिषेक शर्मा आणि संजू सॅमसन करणार असून, ईशान किशन तिसऱ्या क्रमांकावर फलंदाजी करताना दिसणार आहे. मधल्या फळीत सूर्यकुमार यादव, रिंकू सिंग, हार्दिक पांड्या आणि शिवम दुबे यांच्यावर जबाबदारी असेल. गोलंदाजीत जसप्रीत बुमराह आणि अर्शदीप सिंग वेगवान गोलंदाजीची मदार सांभाळतील, तर फिरकीत अक्षर पटेल आणि वरुण चक्रवर्ती महत्त्वाची भूमिका बजावतील.
भारताची प्लेइंग इलेव्हन: अभिषेक शर्मा, संजू सॅमसन (विकेटकीपर), ईशान किशन, सूर्यकुमार यादव (कर्णधार), रिंकू सिंग, हार्दिक पांड्या, शिवम दुबे, अक्षर पटेल, अर्शदीप सिंग, जसप्रीत बुमराह, वरुण चक्रवर्ती.
न्यूझीलंडची प्लेइंग इलेव्हन: टिम रॉबिन्सन, डेव्हॉन कॉनवे (विकेटकीपर), रचिन रवींद्र, ग्लेन फिलिप्स, मार्क चॅपमन, डॅरिल मिचेल, मिचेल सँटनर (कर्णधार), क्रिश्चियन क्लार्क, काइल जॅमीसन, इश सोढी, जेकब डफी.
