संधीचे सोने! तब्बल ९७ सामन्यानंतर कसोटी पदार्पणाची संधी मिळेलेल्या फलंदाजाचा न्यूझीलंडविरुद्ध शतकी तडाखा

न्यूझीलंड विरुद्ध दक्षिण आफ्रिका (NZ vs SA Test Series) यांच्यात शुक्रवारी (२५ फेब्रुवारी) दुसरा कसोटी सामना सुरू झाला. ख्राइस्टचर्चमध्ये हा सामना खेळला जात आहे. पहिल्या कसोटी सामन्यात दक्षिण अफ्रिका संघ एक डाव आणि २७६ धावांनी पराभूत झाला होता. पण उभय संघातील दुसऱ्या सामन्याची सुरुवात दक्षिण अफ्रिकेने चांगल्या प्रकारे केली आहे. याचे श्रेय त्यांचा ३२ वर्षीय सलामीवीर सॅरल इरवी (Sarel Erwee) याला जाते. ही त्याची पदार्पणाची कसोटी मालिका आहे दुसऱ्या सामन्यात त्याने शतकी खेळी केली आहे.

सॅरेल इरवीने न्यूझीलंडविरुद्धच्या पहिल्या कसोटी सामन्यात कसोटी पदार्पण केले. परंतु, पहिल्या कसोटी सामन्यात त्याला अपेक्षित प्रदर्शन करता आले नाही. पहिल्या सामन्याच्या पहिल्या डावात तो १०, तर दुसऱ्या डावात ० धावांवर बाद झाला होता. संघाच्या एकंदरित प्रदर्शनावर त्याच्या खराब खेळीचा परिणाम झाला आणि सामन्यात संघाने पराभव पत्करला.

पण आता दुसऱ्या सामन्यात मात्र कर्णधार डीन एल्गर आणि इरवी यांनी पहिल्या विकेटसाठी १११ धावांची भागीदारी केली. एल्गर ४१ धावा करून बाद झाला, पण इरवी दुसऱ्या बाजूला टिकून खेळत राहिला. इरवीने २२१ चेंडूत १०८ धावा साकारल्या. पहिल्या दिवसाचा खेळ संपेपर्यंत दक्षिण अफ्रिकेने तीन विकेट्सच्या नुकसानावर २३८ धावा केल्या.