बेंगलोरचा राजस्थानवर ‘रॉयल विजय’; चेन्नईला पछाडत गुणतालिकेत पुन्हा ‘या’ स्थानी झाले विराजमान

हा बेंगलोरचा या हंगामातील सलग चौथा विजय होता. यापुर्वी हंगामातील पहिल्याच लढतीत बलाढ्य मुंबई इंडियन्सला २ विकेट्सने पराभूत करत त्यांनी आयपीएल २०२१ चा शुभारंभ केला होता. त्यानंतर सनरायझर्स हैदराबादला ६ धावा आणि कोलकाता नाईट रायडर्सला ३८ धावांनी पराभूत करत त्यांनी आपली विजयी घोडदौड कायम राखली होती.

आता राजस्थानवर मात करत बेंगलरोने गुणतालिकेत पुन्हा अव्वलस्थानी उडी घेतली आहे. सर्वाधिक ८ गुणांची कमाई करत +१.००९ नेट रन रेटसह त्यांनी या स्थानावर ताबा मिळवला आहे. यापुर्वीही विजयाची हॅट्रिक पूर्ण करत त्यांनी अव्वल स्थान गाठले होते. परंतु एमएस धोनीच्या नेतृत्त्वाखालील चेन्नई सुपर किंग्ज संघाने त्यांच्या मागील सामन्यात राजस्थानला पराभूत करत या स्थानावर झेप घेतली होती.

मात्र आता पुन्हा बेंगलोरने चेन्नईला पिछाडीवर टाकले आहे. ६ गुण आणि +१.१४२ नेट रन रेटसह चेन्नईची दुसऱ्या स्थानावर घसरण झाली आहे. तर दिल्ली कॅपिटल्स आणि मुंबई इंडियन्स अनुक्रमे तिसऱ्या आणि चौथ्या स्थानी आहेत. दिल्ली संघ +०.४२६ नेट रन रेट आणि ६ गुणांसह तिसऱ्या स्थानावर आहे. तर मुंबई ४ गुण व +०.१८७ नेट रन रेटमुळे चौथ्या स्थानावर आला आहे. याबरोबरच हंगामातील पहिला विजय नोंदवत सनरायझर्स हैदराबाद संघ टॉप-५ मध्ये जागा मिळवण्यात यशस्वी ठरला आहे.