पुणे: हिरो इंडियन सुपर लिगच्या उपांत्य फेरीतील पहिल्या टप्याच्या सामन्यात बुधवारी एफसी पुणे सिटी आणि बेंगळुरू एफसी यांच्यात गोलशून्य बरोबरी झाली. दोन्ही संघांनी जोरदार चाली रचत केलेल्या प्रयत्नांना फिनिशिंगची जोड मिळाली नाही. दुसऱ्या टप्याचा सामना रविवारी बेंगळुरूमधील श्री कांतिरवा स्टेडियमवर होईल.
पदार्पण करणाऱ्या बेंगळुरूविरुद्ध पुण्याने चेंडूवरील ताब्यात 52-48 असे वर्चस्व राखले होते. पहिल्या सत्रात सुनील छेत्रीने फ्री-किकवर भिरभिरत मारलेला चेंडू पुणे सिटीचा गोलरक्षक विशाल कैथने अडविला. दुसऱ्या सत्रात पुणे सिटीचा बदली खेळाडू इसाक वनमाल्साव्मा याला नेटसमोर चेंडूवर नियंत्रण मिळविता आले नाही. दोन्ही संघांसाठी या संधी हुकणे निराशाजनक ठरले. श्री शिवछत्रपती क्रीडा संकुलात उपस्थित 9284 प्रेक्षकांना मात्र चुरशीचा खेळ पाहायला मिळाला.
चौथ्या मिनिटाला पुण्याच्या साहिल पन्वरने उजवीकडून चेंडू छान मारला, पण आशिक कुरुनियान याला छातीवर चेंडू नियंत्रीत केल्यानंतर अचूक फटका मारता आला नाही. बेंगळुरूने सुरवात सावध केली होती. पुण्याच्या डावपेचांचा अंदाज घेण्याकडे त्यांचा कल होता.
19व्या मिनिटाला मार्सेलिनियोने सुमारे 35 यार्डावरून फ्री-किकवर मारलेला चेंडू मार्को स्टॅन्कोविच याच्यापाशी गेला. मार्कोने मारलेल्या फटक्यात मात्र ताकद नव्हती. त्यामुळे चेंडू बाहेर गेला. 31व्या मिनिटाला बेंगळुरने पहिला भक्कम प्रयत्न केला. फ्री-किकवर छेत्रीने उजव्या पायाने अफलातून किक मारली. हा चेंडू पुणे सिटीचा गोलरक्षक विशाल कैथ याने उंच उडी घेत डाव्या हाताच्या बोटांनी नेटवरून घालविला. छेत्रीची संधी थोडक्यात हुकल्यामुळे बेंगळुरूचे प्रशिक्षक अल्बर्ट रोका यांना निराशा लपविता आली नाही.
त्यानंतर बेंगळुरूला कॉर्नर मिळाला होता. त्यावर टोनी डॉवलने उजवीकडून पेनल्टी क्षेत्रात फटका मारला. मिकूच्या दिशेने चेंडू गेला, त्याने हेडिंग केले, पण चेंडू नेटवरून गेला. 38व्या मिनिटाला कुरुनियान याने मध्य क्षेत्रात चेंडूवर ताबा मिळवित आगेकूच केली. त्याने मारलेला चेंडू मात्र क्रॉसबारवरून बाहेर गेला. 36व्या मिनिटाला कुरुनियान यानेच उजवीकडून घोडदौड केली. त्याने मारलेला चेंडू मार्सेलिनियोच्या मागे पडला. मार्सेलिनियोने बॅकपासचा प्रयत्न केला, पण तो चुकला.
दुसऱ्या सत्रात 48व्या मिनिटाला एमिलियानो अल्फारोने पेनल्टी क्षेत्रात प्रवेश केल्यानंतर डाव्या पायाने मारलेला फटका बेंगळुरूच्या बचाव फळीकडून अडविला गेला.
51व्या मिनिटाला बेंगळुरूचा प्रयत्न थोडक्यात हुकला. डिमास डेल्गाडोने कॉर्नरवर मारलेला चेंडू बोईथांग हाओकिपने हेडींग केला. तेव्हा छेत्री पुढे असूनही जुआनन याने मागून धावत येत प्रयत्न केला. त्यावेळी जुआनन याने कॉल देत समन्वय साधला नाही म्हणून छेत्रीने जाहीर नाराजी व्यक्त केली.
75व्या मिनिटाला पुण्याचा प्रयत्न थोडक्यात हुकला. मार्सेलिनियोने चेंडूवर ताबा मिळवित बदली खेळाडू इसाक वनमाल्साव्मा याला पास दिला. इसाक नेटसमोर होता, पण त्याला नीट अंदाज घेता आला नाही आणि त्याची किकच हुकली.
निकाल:
एफसी पुणे सिटी : 0 बरोबरी विरुद्ध बेंगळुरू एफसी : 0