रॉयल चॅलेंजर्स बंगळुरूने (RCB vs PBKS) पंजाब किंग्सचा 23 धावांनी पराभव केला आहे. आयपीएल 2026 मधील सलग सहाव्या पराभवामुळे पंजाबच्या प्लेऑफच्या आशांना मोठा धक्का बसला आहे. धर्मशाला येथे खेळल्या गेलेल्या या सामन्यात बेंगळुरूने प्रथम फलंदाजी करत 222 धावा केल्या होत्या. शशांक सिंगच्या झुंजार अर्धशतकानंतरही पंजाबचा संघ लक्ष्यापासून 23 धावा दूर राहिला. हा तोच पंजाब किंग्सचा संघ आहे जो हंगामातील पहिल्या सात सामन्यांमध्ये एकही मॅच हारला नव्हता. पॉईंट्स टेबलवर नजर टाकली तर पंजाबचे 13 सामन्यांत 13 गुण आहेत आणि संघ चौथ्या स्थानावर आहे. लीग स्टेजमध्ये आता फक्त एकच सामना उरला आहे, मग फक्त एक सामना पंजाबला प्लेऑफमध्ये पोहोचवू शकतो का?
नाही, पंजाब किंग्स अजूनही प्लेऑफच्या शर्यतीत कायम आहे. मात्र, बंगळुरूकडून मिळालेल्या पराभवानंतर त्यांचे टॉप-4 मध्ये राहण्याचे आव्हान कठीण झाले आहे. पंजाबचे 13 सामन्यांत 13 गुण आहेत आणि लीग स्टेजमध्ये त्यांचा आता फक्त एकच सामना शिल्लक आहे. हा शेवटचा सामना त्यांना 23 मे रोजी लखनऊ सुपर जायंट्सविरुद्ध खेळायचा आहे. लखनऊचा संघ आधीच प्लेऑफच्या शर्यतीतून बाहेर पडला आहे.
पंजाबला जर प्लेऑफमध्ये जायचे असेल, तर त्यांना हा शेवटचा सामना मोठ्या फरकाने जिंकावा लागेल, ज्यामुळे त्यांचे एकूण 15 गुण होतील. आता गुजरात आणि बंगळुरूची बरोबरी करणे पंजाबसाठी शक्य नाही, याचा अर्थ पंजाबचा संघ आता ‘टॉप-2’ मध्ये स्थान मिळवू शकत नाही.
पंजाबला प्लेऑफमध्ये पोहोचण्यासाठी या समीकरणांची गरज आहे. पंजाबने त्यांचा शेवटचा सामना कसाही करून जिंकावा. सनरायझर्स हैदराबादने त्यांचे पुढील दोन्ही सामने हरावेत. तसेच चेन्नई सुपर किंग्स (CSK) आणि राजस्थान रॉयल्स (RR) यांना 14 गुणांच्या पुढे जाता येऊ नये. पंजाबचा नेट रन रेट (NRR) इतर संबंधित संघांपेक्षा चांगला असावा.
